Dialuna 31 di Maart:
ORANJESTAD (AAN) Un di e malesanan cu mas ta afecta e poblacion mundial ta Cancer di Tripa (conoci na ingles como ‘colon cancer’ y na spaño como ‘cáncer de colon’), y e malesa aki ta e di dos causa di morto di hende homber y hende muher rond mundo.
E meta pa observa e fecha aki, ta sensibiliza henter humanidad tocante e necesidadnan cu tur pashent cu ta wordo diagnostica cu e malesa aki tin.
Alavez, pa busca informacion y controlnan pa detecta e malesa aki den un etapa trempan, cu por permiti scapa bida y preveni e diagnostico atravez di habitonan di bida hopi mas saludable.
Loke ta cancer di tripa: Cancer di tripa ta un patologia causa door di un crecimento anormal di e celnan di e tripa y e zona rectal.
Tur cos ta cuminza cu un crecimento di poliponan, cu transforma nan mes cu e paso di e añanan den cancer, no obstante tin personanan unda e situacion aki no ta presente.
Esaki ta un tipo di cancer basta comun na henter mundo, pero door di un evaluacion trempan por, facilmente wordo detecta y trata, cu resultadonan hop faborable pa e pashentnan ya cu por scapa nan bida.
Factornan di riesgo: Entre e factornan di riesgo mas comun por menciona: antecedentenan familiar, edad di e pashent, cu a sufri den pasado algun patologia manera colitis ulceroso, malesa di Crohn, enfermedadnan inflamatorio di e sistema digestivo.
Tambe mester referi na e factornan di riesgo externo, relaciona cu alimentacion, consumo di substancianan toxico manera cigaria, alcohol y droga.
P’esey ta hopi importante cuida e habitonan di alimentacion pa biba un bida sano y largo.
Testnan di Cribato: Esaki ta testnan special, cu ta wordo realiza pa detecta sanger scondi den af, den hende cu por ta propenso pa contrae e enfermedad, y di e forma aki, realiza un diagnostico trempan pa evita e aparicion di cancer di tripa y asegura e supervivencia di e pashentnan.
Door di e programa aki, ta busca manera pa menos hende wordo afecta pa e cancer aki, cual, detecta na tempo por tin un resultado altamente efectivo, y curativo.
Lamentablemente, e tipo di estudio aki no ta accesible pa tur persona debi na su costo financiero hopi halto y solamente esnan cu ta dispone di e medionan economico suficiente pa paga esaki, por realize.
Sintomanan: Cambio den e habitonan di bay af, sanger den e af, diarea, ceramento di barica, sensacion cu e tripa no a basha completo, colico abdominal cu no ta kita, perdida di peso cu no por splica.
Cambio di estilo di bida: Un dieta ekilibra ta fundamental pa preveni cualkier tipo di cancer. Awe mas cu nunca ta urgi un cambio di estilo di bida pa por biba di manera mas saludable y mas aña.
Na prome lugar mester haci un cambio di alimentacion, manera aumenta e consumo di fruta, vegetal, berdura, alimentonan rico den fibra manera cereal integral, y evita alimento procesa, vet satura, y cuminda chatara.
Cu e cambionan aki e curpa por expulsa facilmente e toxinanan cu ta keda atrapa den e organismo, y ta vital pa bebe hopi likido, principalmente awa pa un miho purificacion di tur organo, specialmente e tripanan.
Tratamento: Via Colonoscopie por detecta si tin polipo cu por bira cancer y extirpa esaki di biaha. Den casonan avanza tin diferente tipo di cirugia. Pero e miho forma ta prevencion.
