ORANJESTAD (AAN): Cuminza marca e fecha di 17 di September den bo calender pa bo no perde e regreso di e “Summer Sidewalk Sale”
cu lo tuma lugar na Engelandstraat 5 (ex-edificio di Playa Liquor) for di 8:00 am te cu 4:00 pm.
DIARIO a compronde cu e biaha aki, e Sidewalk Sale lo bay tin surtido amplio di articulonan nobo y usa di Marriott Vacation Club, Bucuti & Tara Beach Resort, The Ritz-Carlton, Renaissance Resort, Tara Eco Supplies, One Love Foundation, y Ben Kaufman na prijsnan increibel.
A splica na DIARIO cu e productonan ta inclui mueblenan varia, matras, serbete, clechi di cama, T-shirts, tayo, glas y hopi mas! Tambe tin e oportunidad di amplia bo famia y duna un cacho of pushi un hogar pa semper via Luna Foundation, Nine Lives Foundation, y Sgt Pepper’s Friends cu lo atende e evento cu mascotanan cu ta cla pa adopcion. Como un treat extra, lo bay bende Taco delicioso pa djis $1 henter dia.
E bon noticia ta cu 100% di e fondonan recauda durante e evento lo wordo uza pa e campaña nacional di sterilisacion di Stimami Sterilisami, cu a sterilisa casi 34.000 cacho y pushi.
Nan ta sumamente agradecido y conmovi door di e ayudo y contribucion di e Hotelnan local, hunto cu demas fundacionnan. Tambe nan ta bisa cu entre e partnernan cu a contribui generosamente, tin di menciona special One Love Foundation y Ben Kaufman. Pasobra nan generosidad no solamente a inclui e donacionnan cu nan a haci pero tambe nan compromiso pa biaha for di Merca pa ta hunto cu nan durante e evento.
