Recordando 24 April 1983 como un dia scur den historia di e lucha pa Status Aparte

MEP No tin lucha sin sacrificio y no tin sacrificio sin gloria!

ORANJESTAD (AAN): Ken por a kere cu 24 di april 1983, esta un dia manera awe 40 aña pasa, lo a bay pa historia pa loke ta trata politica di Aruba y Reino Hulandes? Ningun persona, pasobra e dia ey tabata uno mescos cu cualkier otro dia, pero cu tabatin un final casi fatal. Hecho ta cu tradicionalmente MEP ta tene su parada di auto riba e diadomingo prome cu eleccion, esta dia 24 di april 1983. Betico Croes na comienso di e parada tabata contento papiando y repartiendo tareanan pa e diferente lidernan di bario.

   E parada manera custumber, acompaña pa e Barco di Libertad, a pasa den tur bario di Aruba y caminda e hendenan tabata para cant’i caminda cu bandera saludando e fila. Pueblo tabata contento, specialmente riba e hecho cu algun siman prome, esta 12 di maart 1983 a concretisa e logro di Status Aparte durante e Conferencia di Mesa Rondo na Hulanda. Durante e parada Betico Croes tabata para manera custumber riba e jeep di su ruman Aiky Croes.

   Atentado riba bida di Betico Croes: Na final di e parada, na yegada di veld di Winston na Santa Cruz, polisnan a manda e jeep subi e veld locual a sosode tambe. Na e momento ey un van di polis a core pasa banda di e veld pa blokia e pasada. Un agente policial a baha cu pistool den man y ora cu Betico a puntr’e kico ta su intencion, dos tiro tabata e contesta: Uno di advertencia y e otro a traspasa e curpa di Betico y ta perfora su pancreas y su intestinonan. Esnan cu a acompaña Betico den e jeep a lant’e for di suela for di conocemento y a hib’e urgentemente hospital. Como cu e parada tabata para, masha poco hende a presencia e tiramento aki. Ora cu mas y mas hende tabata yegando e sitio, e multitud a cuminsa lanta contra e polisnan.

   Tension den pueblo :  Mientras tanto e atencion a cuminsa cambia den preocupacion pa e estado di Betico y e multitud a cuminsa dirigi nan mes pa hospital. E pueblo tabata conmovi pa loke a sosode cu su lider. Un tension grandi tabata reina y e situacion tabata explosivo. Aruba tabata riba bao, comunicacion telefonico a cay completamente, mientras cu pueblo tabata roga pa su bida. Nos pueblo sinembargo a demostra su civismo y no a comete actonan di destruccion. Tur actividad politico a ser para pa e dia ey y e siguiente dianan. Un alivio grandi a pasa den pueblo ora cu Betico a papia for di hospital na television, pidiendo su pueblo trankilidad y pa bay vota su diabierna siguiente. Por cierto un eleccion caminda Betico Croes a obtene e record di voto na Aruba, esta 10506 voto riba su nomber.

   Recuperacion di Betico Croes : Despues di algun dia Betico Croes su situacion a empeora y el a wordo transporta pa Jackson Memorial Hospital na Miami. Na Miami poco poco Betico a recupera di e herida di bala y dia 26 di augustus 1983 el a bolbe su isla natal, sano y salvo y pa continua cu su lucha pa Aruba su libertad.

   E historia cortico aki ta pa recorda un biaha mas cuanto sacrificio, sodor, lagrima y te hasta sanger a wordo derama door di nos Libertador pa awe nos ta un pais autonomo den Reino Hulandes. Pero manera Betico Croes mes semper a bisa cu no tin lucha sin sacrificio y no tin sacrificio sin gloria.  Pues laga e dia di awe ta un dia di reflexion pa nos tur cu firmeza gara e bandera Arubano y sigui lucha pa conserva nos libertad.