Parlamentario Marco Berlis (MEP):
ORANJESTAD (AAN): E tema di BBO na frontera lo bira un realidad riba e fecha di prome di Juni 2023. Por a scucha Mike Eman sali riba e tema hunto cu algun miembro di e fraccion berde, cu deliberadamente a duna informacion falso y no a splica e contenido di e maneho di e ley como debe ser.
Pa e motibo aki mi a dicidi di skirbi varios articulo riba e tema semper uzando fuentenan, documentonan y presentacionnan di experto, profesionalnan y comerciantenan cu ta familiar cu e topico aki. Den e articulo di awe mi lo elabora riba e ponencia di Comerciantenan Uni cu a vocifera nan opinion riba BBO na frontera riba dia 21 di November 2022 den un entrevista cu prensa. Den e entrevista sr. Frans Ponson a haci declaracionnan cu Comerciantenan Uni ta di acuerdo cu e ley di BBO na frontera.
Comerciantenan Uni ta di acuerdo cu BBO na frontera
Frans Ponson di Comerciantenan Uni a expresa di ta di acuerdo cu e BBO na frontera.
Comerciantenan Uni ta di acuerdo pasobra e BBO na frontera ta trece un “Level Playing Field” pa comercio en general. Kico esaki ta significa? Cu e BBO na frontera lo haci e competencia mas husto pasobra awor negoshinan ilegal tambe lo mester paga BBO pa su productonan, manera comercio ta haci actualmente. Esaki lo haci cu e prijs di e negoshinan ilegal tambe mester wordo ahusta pasobra nan gasto lo subi. Di e forma aki comercio local no lo wordo perhudica pa comercio ilegal mas.
Sr. Ponson a bisa cu BBO na frontera lo wordo paga “adelanta” awor enbes di “na final” ora di benta. Adelanta den e sentido cu ora e container of producto yega frontera ta paga BBO. E bunita di e ley nobo di BBO na frontera ta cu, mesun luna comerciante por declara e BBO aki na Belastingsdienst y por kita henter e suma aki di nan “omzet” e mesun luna. Esaki ta haci cu e gastonan di e comerciante NO ta subi.
Negoshinan ilegal tambe ta contribui awor na economia di Aruba pasobra awor nan tambe mester paga BBO na frontera. Ya no lo tin un manera pa evita di paga e BBO pa nan productonan mas. DIMP ta calcula cu pais Aruba lo haya 20 miyon florin mas di entrada cu BBO na frontera lo produci entrante Juni 1, 2023.
Negoshinan ilegal no lo por trek af BBO y pesey tampoco disfruta di e beneficionan cu un negoshi legal si tin. Akinan negoshinan ilegal ta perde e oportunidad di e BBO hibrido aki.
Comerciantenan Uni tabata kier pa gobierno introduci e BBO na frontera prome cu a subi e BBO en general.
Por bisa cu den su entrevista cu prensa Comerciantenan Uni a expresa di un forma sumamente positivo riba e BBO na frontera y a enfatisa e importancia di introduci e ley aki. Nos por bisa cu e introduccion di e BBO na frontera ta un BBO hibrido, pasobra en realidad e lo funciona como un BTW.
Un di e kehonan mas grandi di comercio semper tabata e competencia inhusto cu ta existi aki riba nos isla, cu awor lo bay wordo elimina di un forma serio y responsabel. Di e forma aki gobierno a demostra di tin oido pa e sugerencianan y deseonan di e gremionan. Proximamente lo introduci e ley aki na Parlamento prome cu 1 di Juni 2023.
