Reconstruccion di e caminda MFA Noord - Turibana lo inicia dialuna proximo

ORANJESTAD (AAN):   Diaranson mainta, Departamento di Obranan Publico (DOW) a yama un rueda di prensa pa asina informa di e trabaonan cu ta bay tuma lugar na Noord entrante otro siman.

Director Interino di DOW, Ing. Jossy Kock a informa cu cuminsa dialuna 12 di Juli proximo ta bay haci un reconstruccion di e caminda entre e rotonde na Noord te na Turibana, cuminsando na altura di Centro di Bario Noord te na centro medico di Noord.

E proyecto aki a wordo parti den dos fase. E prome fase lo inicia dialuna awor, a duna di conoce.

Kock a agrega cu ta den temporada di vakantie di scol y e duiker cu tin net despues di entrada di Centro di Bario Noord  ta den hopi mal estado y tin cu bay drecha esaki.

E ta bira un combinacion di dos trabao. E drechamento di e duiker di Noord, net despues di CB Noord y e reconstruccion di e caminda cual ta den hopi mal estado y a dicidi di drecha esaki completamente entre e rotonde di Noord te na e cruzada despues di Noord Medical Center.

Manera a wordo indica caba, e trabao aki lo wordo haci den 2 fase.

- Fase 1 lo ta di e T-weg di MFA Noord te pa Giselle Department Store y esaki lo tin un duracion di 3 siman.

- Fase 2 lo di Giselle Department Store pa Noord Medical Center cu lo tin un duracion di 2 siman.

E ruta di desviacion lo wordo indica cu borchi y baricadanan di aviso, Jossy Kock a splica, pa asina tur hende por yega na nan destino.

Ta pidi cooperacion di tur automobilista y principalmente esnan cu ta haci uzo di e area aki pa tene cuenta cu e desviacion den trafico cu tin.

Pa esnan cu ta residente y pa e hotel eybanda tin solucionnan cu ta indica via borchi y hekinan di trafico.

Ing. Kock a remarca cu den e fase aki lo bay tin un par di cas cu no ta accesibel . No ta hopi (3 pa 5 cas), pero ta pidi cooperacion di antemano caba pa e habitantenan di e casnan aki pa tene comprension y para nan auto un tiki leu for di nan cas pa asina y yega nan cas na pia.

E otro habitantenan di e area si ta bay ta accesibel pa yega nan cas cu auto y nan lo haya un carta unda ta splica con nan por yega na nan cas, a enfatisa.

E representante di DOW a sigui bisa cu e trabao aki ta wordo realisa den temporada di vakantie di scol unda tin menos trafico ta circula den e area aki y di e forma aki por haci e trabao mas lihe posibel.

Ta bay traha oranan largo pa keda cla cu e caminda aki mas lihe cu ta posibel, expresa.