ORANJESTAD(AAN): Secretario di Estado Raymond Knops ta di bishita na Aruba y despues cu el a reuni cu Prome Minister Evelyn Wever Croes, a tuma lugar un conferencia di prensa.
Durante e rueda di prensa Prome Minister a indica cu a reuni riba e asuntonan riba cual a papia durante ultimo 3 aña y 9 luna.
“Ta trata di finanzas di Aruba, recuperacion di Aruba y e palabracionnan cu nos a haci den cuadro di e sosten di likidez, landspakket y e Rijkswetten”.
Nos a tene hopi bon combersacionnan y mirando cu muy probablemente esaki ta e ultimo viahe di Knops pa Aruba den e capacidad aki, den nomber di Gobierno di Aruba mi a gradici e Secretario di Estado pa e bon cooperacion y pa e ayudo cu nos a logra haya durante e periodo hopi dificil aki, segun e mandatario.
