Reconocimento na hobennan modelo cu a destaca internacionalmente

ORANJESTAD (AAN): Prome Minister Evelyn Wever-Croes a ricibi e 5 modelonan cu recien a participa na OFK Orlando y a obtene diferente titulo pa Aruba.

  Prome Minister a tuma e oportunidad di combersa cu cada un di e representantenan riba nan experiencia den e ramo di modelahe y nan representacion den exterior.  A papia cu Tanique Chan kende aña pasa a logra titulo maximo di Miss Tropical na Republica Dominicana.  Despues Tanique a representa Aruba na New York Fashion Week, Los Angeles Fashion Week y lo ta participando e aña aki na September den e London Fashion Week. Mester remarca cu Tanique ta e prome mucha special di Aruba cu a modela riba pasarela di Fashion Week, na New York y Los Angeles.

   Tambe tabata presente e modelonan cu  recien a representa Aruba na Orlando Fashion Kids, unda e modelonan aki a sa di luci pañanan diseña pa costureranan local y pañanan di e diseñadornan internacional cu tabata presente na e fashion show. Uno ta Ciara Winterdaal cu haya titulo di Baby Top Model, Caithlyne Kock cu e titulo Pre-teen Top Model, Javinah Besselink cu di dos lugar di Teen Top Model y Stacey de Veer cu a bay cu e titulo di Super Top Model.

   Prome Minister a expresa di ta sumamente orguyoso di cada un di nan pa a representa nan isla dignamente poniendo Aruba su nomber un biaha mas riba tarima internacional. Tambe, Prome Minister a gradici e directora di The Chaz Model and Talent School sra. Chastity Kock-Hodge pa su dedicacion, pasenshi y amor pa guia e muchanan den logra nan soño di bira modelonan internacional.