Caida di decencia como norma ta exigi control pisa y mas regla
- Mundo politico y aparato gubernamental mester mas control
- Na forma sistematico negoshi criminal ta ataca proceso legal
ORANJESTAD (AAN)- “Mester cuminsa atende cu corupcion na un forma sistematico manera e situacion actual ta exigi.”
Esaki ta informacion concreto cu DIARIO a ricibi di informantenan, cu ta splica con rond mundo, autoridad ta na careda pa mira con mester atende cu corupcion, cu ta e menasa di mas grandi.
Den pasado tabata asina, cu cierto regionnan y paisnan na mundo tabata wordo considera e neishinan mas importante di loke ta wordo yama corupcion cu ta realmente e ladronicia di placa y derecho di Pueblo pa sirbi bienestar personal.
Directamente den region di Aruba, tabata mustra dede riba loke tabata wordo yama Republica di Banana, cu tabata gobernacionnan den cual democracia a wordo silencia pa asina corupcion haci su entrada na tur nivel.
Informantenan a hiba nos di regreso den tempo y a mustra con den pasado tabata tin cierto paisnan cu tabata conoci pa corupcion for di nan porta di entrada.
Na yegada na aeropuerto of haf di e paisnan, bishitantenan tabata hinca un biyete di Dollar Mericano (cu ta e moneda cu por cambia mas facil) den nan pasaporte ora nan mester pasa servicionan manera Douane y Immigracion.
Na e republicanan aki hopi placa sushi tabata circula na forma sushi y esaki tabata haci cu henter e sistema democratico a wordo afecta ya cu politiconan tabata keda na mando pa e poder cu nan tin a base di corupcion cu tabata yega te den seno di nan gruponan militar.
Formanan nobo pa placa circula a cambia e sistemanan aki. Hinca placa den pasaporte, manera a bini dilanti, te awe ta wordo aplica na cierto aeropuertonan di paisnan conoci como corupto na mundo.
Pero awe tin sistemanan mucho mas sofistica pa atende cu esaki y alarma ta wordo bati na diferente pais, incluso Hulanda, pa e forma cu corupcion ta menasa di bira parti di e sistema gubernamental.
E aspecto di crimen organisa ta bini mas y mas dilanti y ta bira hasta negoshi specialisa den habri canal entre publico y funcionarionan corupto a base di pago na agencianan di corupcion.
E companianan aki, manera fuentenan oficial den mundo di noticia ta trece dilanti rond mundo, ta specialisa den busca informacion di funcionarionan den problema financiero, cu nan ta duna placa a cambio di fabor.
E situacion mundial a bira asina alarmante, cu autoridad ta yega na e conclusion, cu tin lazo entre mundo criminal y personanan cu ta traha cu servicionan cu pa ley mester ricibi informacion personal di personanan.
Informantenan cu a pone DIARIO riba pista di e accionnan internacional pa combati corupcion, cu no solamente ta produci placa pero ta bira fuente pa comete criminalidad, ta mustra cu sistemanan nobo di control ta wordo introduci.
Importante ta bira den esaki pa implementa regla kende tin acesibilidad na cual tipo di informacion y evita cu informacionnan personal di hende por wordo duna na negociantenan den informacion na mundo criminal.
Según expertonan, e asuntonan aki mester wordo discuti na e nivelnan mas halto den Reino Hulandes pa asina conhuntamente tuma medida y trece cambio den formanan cu informacion personal di hende, ta wordo entrega na otro.
