*Reconocemento na e Campionnan di Servicio den e proyecto pa recauda fondo ‘Helping the Helpers’*

Presidente di Aruba One Happy Island Lions Club Aliyuri Arends:

ORANJESTAD (AAN): Hopi biaha, esnan cu ta dedica nan mes na trabou voluntario den clubnan di servicio no ta haya e reconocemento cu nan realmente merece. Nan esfuerso no ta haya atencion, mientras cu nan impacto ta grandi y profundo den nos comunidad. P’esey, ta fundamental pa tuma un momento pa para, mira, y reconoce e balor di nan trabou y Aruba One Happy Island Lions Club ta compronde e balor grandi agrea di su miembronan y tur esnan cu ta haci trabounan boluntario den nos comunidad. 

Durante e evento LCIF Art Night 2026, Aruba One Happy Island Lions Club a mustra gratitud y aprecio na su miembronan cu a contribui na un manera extraordinario. Den un ambiente di arte, union y inspiracion, e club a pone luz riba esnan cu ta traha cu corason grandi pa logra metanan di e club. 

Bou e tema “Champions of Service – Helping the Helpers,” Presidente Aliyuri Arends a honra tur miembro cu a yuda haci e rifa “Helping the Helpers” un exito. Door di nan dedicacion, compromiso y empeño den benta di ticket, nan a demostra e berdadero amor y dedicacion di Lionismo: servicio sin condicion, lidera cu ehemplo, y crea impacto real. 

E contribucion di cada miembro no solamente a fortalece e capacidad di e club pa yuda esnan cu tin necesidad, pero tambe a eleva e comunidad den su totalidad. E accionnan aki ta prueba cu ora nos traha hunto, nos por logra cambio berdadero. 

“Cu sincero aprecio y gratitud, nos ta expresa un danki grandi na tur esnan cu ta sigui comprometi na servicio. Hunto nos ta sirbi. Hunto nos ta crea diferencia. Hunto nos ta sigui yuda esnan cu ta yuda”, señora Arends a expresa.