JOIA Aruba by Iberostar ta yudando e isla adkiri turistanan di calidad

Marcando nan di prome aniversario

• Metanan di desaroyo sostenibel ta keto bay na prome lugar 

ORANJESTAD (AAN): Diahuebs mainta gerencia di JOIA Aruba by Iberostar a tene un presentacion pa prensa pa mustra con hopi progreso nan a logra no djis den bira un atraccion nobo di turista pa e isla, sino tambe pa mira con grandi nan colaboracion ta sigui riba proteccion di flora y fauna riba e isla, cu enfoke grandi dirigi riba proteccion di miedo ambiente y sostenibilidad.

   Gerente general Arnaud Le Lanchon hunto cu e local Jareth Vermeulen (Sustainability Alliance Manager) a duna un bista riba tur loke e compania a bin ta haciendo riba e isla, y cuanto plan mas nan tin nan dilanti cu nan resort, y tambe e futuro resort cu lo wordo construi riba tereno di Tierra del Sol, cu tambe ta pertenece na e cadena Iberostar.

   Iberostar a demostra durante su construccion, y tambe awor cu e renobacion na Tierra del Sol, cu nan ta haci esaki na forma responsabel.  Tur cos cu nan haci, nan kier pa e wordo haci na un sistema responsabel, no djis pa e comunidad, y stakeholdernan, y pa pueblo, sino pa e medio ambiente cu tur hende ta biba aden.

   Gerente general Le Lanchon a indica cu esey ta un di nan meta keto bay na JOIA Aruba, pa purba reduci e cantidad di desperdicio cu ta wordo produci.  Nan ta haciendo empuhe pa otro Hotelnan na Aruba tambe uni na e meta aki.  E aliansa cu Hotelnan y cu comunidad a wordo cristaliza, despues di a tende kico e bottlenecks ta den cierto procesonan na Aruba, incluyendo reciclahe di plastic.

   Tur esaki ta forma parti di e movimento “Wave of Change” cu ta algo cu Iberostar ta orguyoso di sigui traha riba dje.  Ademas tur empleado ta haya training riba e asunto aki, pa nan tin un ‘mindset’ cu ta dirigi riba proteccion di medio ambiente y sostenibilidad.

    Iberostar ta dedica semper na transparencia, responsabilidad, y inversion di termino largo den comunidad local.  Den un aña, Iberostar a bira un parti activo di e paisahe social, economico, y medio ambiente di Aruba.  E compania a scucha sociedad y voznan di autoridad, y a lanza iniciativanan cu bon resultado den adkiri empleado, duna training, forma partnership cu gruponan NGO y stakeholdernan local, economia circular, y educacion di medio ambiente, y tambe nan proyecto principal di biodiversidad, dirigi riba e Shoco, cu ta e simbolo nacional di Aruba.

   JOIA Aruba tin un lokaal special crea yama ‘Aula di Lama’, cu ta un espacio unda hopi klas di scolnan na Aruba a bay pa haya curso, ricibi educacion encuanto oceano.  Fuera di esey tin varios scol ta uza e local aki, como tambe gruponan NGO, di comunidad, y Iberostar ta orguyoso di esey.  Den un aña di tempo, den e ‘Aula di Lama’ aki a organiza mas di 145 actividad, di cual 21 ta actividad educacional cu mucha, 8 conferencia publico, 20 sesion di training pa docente, beneficando mas di 1.290 individuo.

    Gerente general Le Lanchon a comenta tambe cu ultimo tempo esnan den mundo di turismo ta bogando pa Aruba haya Turistanan di nivel mas halto cu si ta bin gasta hopi placa riba e isla.  Cu orguyo el a mustra cu JOIA Aruba by Iberostar ta sigui atrae e tipo di turistanan aki di nivel halto, pues ta dunando un contribucion grandi na e deseo ey.

   Iberostar ta nobo, pero den poco tempo ya a compronde e “necesidad di Aruba” y ta trahando duro pa sigui progresa y mehora tur esaki.  E Resort tin 460 empleando y prome cu nan cuminza traha, nan ta ricibi un promedio di 30 ora di training, y pesey 100% di tur empleado a ricibi training riba sostenibilidad.  Pabien na tur esaki.