Reconocemento di Cas di Papiamento pa Ramon Todd Dandaré Mag.Ling.

ORANJESTAD (AAN):  Diasabra dia 19 di october Cas di Papiamento a tene un atardi special dedica na Sr. Ramon Todd Dandaré.

Ramon a bishita Riohacha, La Guajira, Colombia dos biaha den e ultimo tempo aki, na mei y na september.

            E dos biahenan aki tabata sumamente exitoso. Durante e atardi aki Ramon a haya e oportunidad pa comparti cu un audiencia hopi interesa loke el a experiencia durante e dos bishitanan ey. Emocionante durante Ramon su presentacion tabata ora el a splica e balor di tur e reconocementonan cu el a ricibi na su pais natal di diferente instancia importante. E instancianan ta

            Asamblea Departamental de la Guajira, Conseho Distrital di Riohacha, Alcaldía Distrital de Riohacha Fundación, Teatro Aurora de Riohacha, Fundación Compartamos la Felicidad y Asociación Kojutajirawaa. Di Asamblea Departamental de la Guajira Ramon a ricibi di diputado Daniel Ceballos e maximo condecoracion Medalla Luis A. Robles Suarez. Di e manera aki La Guajira ta reconoce publicamente Ramon su meritonan destacante y e trabou briyante cu el a desplega como investigador, academico, docente, conferencista y gestor cultural di Gran Caribe.

Tur persona cu a haci acto di presencia diasabra a keda impresiona cu e presentacion aki!

Ramon a keda masha contento cu e oportunidad aki pa por a comparti su experiencia cu su famia y tur presente.

            Cas di Papiamento tambe a sorprende Ramon cu un bunita plakkaat. Ramon sigur merece tur merito y reconocemento pa a lucha incansablemente pa nos idioma materno Papiamento cu mester haya e luga cu e merece den nos comunidad y den enseñansa!

Ramon mes no tin Papiamento como idioma materno, pero su amor y su respet pa nos idioma desde edad di nuebe aña ora el a bin biba na Aruba a haci cu Ramon a dedica y ta sigui dedica gran parti di su tempo na nos idioma!

            Ramon di su parti a expresa su gradicimento sincero y profundo na Swinda y Jay pa a organisa e atardi/anochi inolvidabel aki p’e na Cas di Papiamento y pa a otorg’e e bunita reconocemento, na Joyce pa tanto cos cu el a haci p’e y cu hunto cu Mientje a percura pa un bunita bouquet y na e audiencia presente, su studiantenan, su coleganan, su amigonan y su yiu, su subrino y su rumannan:

            “Boso tur a haci di e actividad aki un acontecemento absolutamente inolvidabel pa mi. Danki, masha danki!”