Amplia Ley di contabilidad awor cu Hulanda a cera cranchi di placa
- Mester persigui abuso di placa di Pueblo constata pa Rekenkamer
- Medida pa Pueblo mester ta mara na exigencia legal di gobernacion
ORANJESTAD (AAN) Manera DIARIO a anticipa, Gobierno di Reino a papia un palabra cla y a mustra cu no por conta mas cu asistencia Hulandes pa yuda cubri gastonan di e pais, crea pa mal gobernacion financiero.
Algo sumamente logico pasobra e relacion entre paisnan den Reino ta basa riba Statuut cu ta exigi pa tur pais den Reino financieriamente para riba nan propio pia.
For di momento cu Aruba a bira pais autonomo den Reino, casonan cu a resulta di maneho abusivo di placa di Pueblo dor di gobernantenan di Aruba, a bini dilanti.
Di e forma aki atentado a wordo comete contra e base di democracia cu ta contene reglanan sagrado pa uzo di e placa di belasting di Pueblo, cu mester wordo vigila dor di Parlamento a base di Ley di Contabilidad y cu asistencia di Algemene Rekenkamer Aruba, e tribunal di Aruba cu ta investiga si placa di Aruba ta wordo uza segun regla.
Na mas cu un ocasion den historia di Aruba, Algemene Rekenkamer Aruba a emiti rapportnan den cual mencion ta wordo haci di e forma cu gobernantenan ta trapa riba ley cu ta entrega exigencianan con mester atende cu placa di Pueblo.
Ley ta regla gobernacion di e pais; loke ta encera uzo di e placa di Pueblo pa e pais por funciona na interes di tur miembro di comunidad y di e pais den su totalidad.
Por considera e Ley di Contabilidad, e regla mas importante di funcionamento democratico di un pais pasobra e ta e capacidad pa un pais por existi, loke ta nifica tene su mes riba pia y percura pa su felicidad y bienestar y felicidad y bienestar di tur ciudadano.
Uzo di placa di Pueblo dor di politiconan pues ta regla den Ley y ta den man di e Departamento di Finanzas, cu mester percura pa e administracion financiero di placa cu ta drenta y sali e pais.
Ta e Departamento di Finanzas ta encarga pa traha un presupuesto, un base pa entrada y gastonan di e pais cu for di Prome di September di e aña prome cu e aña cu e lo wordo uza, ta wordo studia pa wordo aproba den Parlamento di Aruba.
Pa yega na e calculacion aki, Departamento di Finanzas ta pidi tur departamento y organo di gobernacion di e pais, pa entrega nan cifranan di entrada y gasto pa e por yega na e cifranan nacional di loke e pais lo ricibi na entrada y loke e pais lo gasta.
E documento aki ta bay Parlamento, cu mester duna su aprobacion na cifranan na cual Gobierno mester tene su mes den gobernacion di e pais. Si resulta cu mester adapta e cifranan despues di algun luna, mester traha un asina yama presupuesto supletorio y ta introduci cambio a base atrobe di aprobacion di mayoria den Parlamento.
Na final di e aña, tur gasto y tur entrada anual, ta bolbe wordo revisa pa asina determina cumplimento.
Control di e proceso aki ta den man di Algemene Rekenkamer Aruba, cu ta e organo cu ta dicidi si Gobierno ta tene su mes na reglanan di maneho financiero di e pais, manera hancra den ley cu ta defende bienestar di Pueblo.
Rapportnan di Algemene Rekenkamer ta wordo traha despues di investigacion di cumplimento manera ta refleha den e Relato Anual, den cual e cifranan berdadero di un pais ta bini dilanti y cu ta bira base pa continuacion di e maneho financiero.
Di e forma aki abuso di placa di Pueblo na tur nivel di gobernacion ta wordo preveni. E forma cu placa di Pueblo a wordo gasta dor di gobernantenan, instancianan gubernamental y nan dirigentenan ta ricibi aprobacion oficial of por bira base pa persecucion penal.
Ley ta exigi pa Pueblo ta na haltura di contenido di Leynan y esaki sigur ta contene tambe e exigencia pa tur hende cu ta ricibi placa di Gobierno como pago, ta na haltura di loke por y no por y con nan mester atende cu e placa di Pueblo.
Abuso di placa di Pueblo pa ley ta ladronicia di placa di comunidad y abuso di e confiansa di Pueblo y e sistema democratico di e pais.
Manera na varios ocasion DIARIO a trece dilanti, e Ley di Contabilidad mester haya un extension cu stipulacion directo di castigo den situacionnan cu placa cu ta wordo kita for di boca di Pueblo, wordo horta of conoce mal uzo dor di gobernantenan of personanan cu ta ricibi placa for di e fondo publico.
Pa Hulanda fiesta a termina.
Esaki ta nifica cu Aruba mes mester frena abuso di e placa cu Pueblo ta entrega pa su gobernacion, cu yudansa financiero di Hulanda ta wordo poni den e proporcion basico di Statuut y Hulanda ya supervisa e exigencia di autonomia cu ta bon gobernacion financiero.
Si e sistema pa goberna un pais, conoce castigo pa crimen, mester introduci castigo pisa pa tur gobernante of participante den gobernacion cu haci nan mes culpabel na tur loke por worde interpreta como corupcion, kiebra di e sistema legal pa atende cu placa, cu ley di belasting ta kita for di boca di Pueblo!
