Reclamo na cantidad di holor fuerte atrobe den algun Supermarket

||| Hendenan ta haya hasta rash ora di drenta negoshi

*Algun tin holor fuerte banda di e rekinan di kipashi y pan

*Suplica pa comunidad raporta esaki mesora na DVG 

ORANJESTAD (AAN): Ultimo dos simannan, diferente ciudadano a bin ta nota cu algun Supermarket na Aruba tin un holor inusual cu bo por sinti ora di haci compras eyden.  E holor aki tin biaha bo ta haye banda di freezernan, coolers, y tambe den area direct di e rekinan unda ta pone kipashi, pan, y cos dushi.

   Pero siman pasa tin mas reclamo cu a drenta, cu e holor aki ta mas fuerte awor.  Compara cu e reclamo antes di uso di ‘mothballs’ y cu a stop di haci esey... awor ta parce cu ta usando algo otro y e no ta nada agradable.

   DIARIO a hasta haya sa cu tin algun ciudadano cu ta haya reaccion rapido di alergia, ta sinti rash na nan curpa, y hasta algun tin lenga ta hincha, asina cu nan drenta algun Supermarket riba e isla.  E ta un reaccion pa “algo” cu ta wordo usa den henter e negoshi sea pa core cu cacalaca, of raton, of otro animal rastrero.

   Tambe tin reclamo keto bay cu e holor di algun empake di beleg ta empeorando, specificamente e plastico tipo ‘cling wrap’ cu algun negoshi ainda ta usando, cu ta bin cu un holor masha desagradable.  Y den fin di siman a bin tende cu hasta holor di algun saco di pan tin hendenan ta trek nan cara.  Y pa colmo e holor di e saconan di pan aki ta hasta “plama” y extende pa tur otro mercancia cu tin poni den reki.

   Pa colmo, a bin haya sa cu tin un dama turista procedente di Europa tambe kende siman pasa a keda 5 dia malo na cama despues di a come algo cumpra na un Supermarket local.  El a haya sintoma estilo ‘venenamento di cuminda’.  E bon noticia ta cu el a recupera, pero a keda cu un mal experiencia e dianan ey.   Nan tambe a raporta cu a haya holor fuerte riba e empake di e producto di “snoep” cu nan a cumpra.

   E speranza tey cu Departamento di Salubridad Publico lo por check e situacionnan aki.  Pero lo mas importante ta pa pueblo raporta tur esaki.  Pesey si acaso abo ta notando algo raro na bo Supermarket, por fabor notifica e propietario.  Si acaso e no haci nada despues di algun dia, lo ta bon pa informa Directie Volksgezondheid DVG Aruba na 522-4200 pa nan por tuma nota di esaki.

   Hendenan a raporta cu nan a haya nan ta benta full un paki di Mini-Pandushi afo debi na e holor.  Tambe a benta full un paki di beleg afo debi na e holor fuerte y casi insoportable.  Y net awor cu entrada di hopi ciudadano ta abao, no tin e luho pa bay cumpra cos y benta nan afo despues.

   Danki Dios cu tin hopi otro Supermarket unda bo no ta sinti e holor aki at all.   Ni den reki, ni den e rijnan, y tampoco na e seccion di pan y beleg.  Pesey kizas un cliente tin di cuminza tuma decision riba su mes, ta cual negoshi e ta acudi pa tin siguranza cu su salud y di su famia ta wordo salbaguardia door di e comerciante tambe.