Recherche a cuminza investiga con un carpachi a yega riba tereno di Thiel Corporation

Caso tiki inusual den fin di siman

ORANJESTAD (AAN): Tur cos ta mustra cu muy probablemente un of mas cacho lo a lastra y trece un carpachi riba tereno di e planta di Thiel Corporation na Canashito par di dia pasa.

   Diabierna mainta e empleadonan cu a presenta na un seccion di e planta pa haci trabao, a bin haya e cabez humano aki abao benta.  Na prome instante a kere cu ta un sorto di chansa ta wordo haci, pero despues a bin realiza cu ta un carpachi di berdad.

   Loke ta pasa aki ta pone hende corda riba loke a socede algun aña pasa den distrito di Noord, ora cu cachonan a lastra y hiba un cabez humano di un cadaver di un cunucu pa otro, y asina hende a detecta esaki y di e forma ey autoridad ta wordo informa.

   Ora cu cachonan haya monton di weso hunto, nan tin preferencia di bay cu e ‘weso di mas grandi’, y den e caso aki e cabez humano ta e trofeo perfecto.  Asina nan ta keda cana cune, y lastre pa un distancia basta largo.  Na final ora cu e wordo descubri, ta bay keda na autoridadnan cu yudanza di instancianan forensico manera NFI di Hulanda, pa yuda identifica di kende e cabez ta.

   Teorianan pa investiga: Di ken e cabez ta?  Chens grandi ta cu e cachonan a logra haya un cadaver den cunucu, y aworaki e poco cos cu a resta di dje ta e carpachi aki cu a bira un sorto di ‘cos di wega’ pa e animalnan y asina nan ta keda cana cune, te ora cu el a yega den di bista di hende, y alarma ta wordo bati.

   Aki tin di bay check e lista di tur hende cu ultimo decada ta perdi riba e isla.  Analisis di e carpachi por bay duna indicacion ta cuanto tempo el a keda exponi na elemento di tempo y a deteriora, pa sa mas o menos ta cuanto tempo e doño tin morto.

   Tin tambe e teoria, cu e cabez aki lo por ta procedente di un graf of kelder di santana.  Algun tempo pasa a surgi un situacion unda a comete vandalismo na un graf y e carpachi a desaparece.

   Testnan DNA cu lo bay wordo haci, sigur lo tuma lugar te na Hulanda, pa asina haya claridad di loke kizas a socede cu e cabez humano aki.

   Diabierna Polis a sella e lugar, pa asina laga Recherche haci nan investigacion na Thiel Corporation.  Personal forensico di BFTO ta esnan cu a recohe e carpachi tratando di preserva tur cos rond di dje.

   Trahadornan di Thiel Corporation a admiti cu tin algun cacho di caya cu ta bin eynan y subi tereno.  Pesey e teoria cu e cachonan aki a lastra y trece e carpachi eyden, ta uno hopi probable.