Recepcion caluroso y musical pa Miss Universe 2024

ORANJESTAD (AAN): Diabierna atardi laat, cu vuelo di Divi Divi Air a yega Aruba, e actual Miss Universe 2024, esta e beyeza Danes, señorita Victoria Kjӕr Thelvig.

   Na su yegada na Aruba, el a wordo ricibi cu un ceremonia den VIP Room na Aeropuerto, y a haya caluroso bon bini di Ministro Mervin Wyatt-Ras cu a entrega un enorme bouquet, y a hiba palabra.  El a yega acompaña pa ehecutivo CEO di Miss Universe Organisation, esta Maria Jose Unda, kende tambe a ricibi flor.

   Victoria lo ta na Aruba di Diabierna 13 di Juni te Diamars 17 di Juni 2025.  El a splica di ta contento di ta na Aruba, y el a sinta ya caba e calor di su hendenan.  Ora di sali pafo pa bay subi su auto, el a topa cu un cordial bon bini cu guardia di honor di diferente mucha y Miss local, y cu musica di Brassband cu a pone cuminza jump comosifuera e conoce e ritmo caba.  Tur candidata a uni cune, y el a sinti mesora e vibe y e forma di jump, y a sigui goza di esaki dilanti Aeropuerto.

   Manera tur ta corda, e modelo aki procedente di Dinamarca a ser corona na November 2024 na Mexico City, como Miss Universe 2024. Su bishita na Aruba ta bao coordinacion di My Dream Institute Foundation Aruba, y nan tin un programa extenso prepara p’e pa e 5 dianan cu e lo ta na Aruba.