Director di Colegio San Antonio, hopi satisfecho:
*Lo traha duro cu esnan cu tin cu haci herexamen pa nan tambe logra
ORANJESTAD (AAN) – Director di Colegio San Antonio, señor Gershwin Lee, a duna Matutino DIARIO informacion tocante e resultado di e prome parti di Examen Klas 2025.
Meneer Lee a indica cu tabata tin un cantidad di 107 alumno di cual 89 alumno a slaag, loke ta nifica 83% di graduado pa e aña aki.
El a expresa cu nan ta hopi satisfecho cu e resultado, y cu nan a haci un par di adaptacion cu a hiba nan na un resultado hopi positivo y ta duna e docentenan e motivacion pa nan sigui.
“Innovacion den enseñanza ta encera hopi cos. Pero, entre otro, e forma con scol ta hinca examen den otro, e forma con nan ta prepara e muchanan, eynan tambe tin un aspecto innovative cu nan a implementa, cu mi ta kere cu a duna nos e resultado positivo cu nan tin e aña aki atrobe”, Director Gershwin Lee a reitera.
El a menciona tambe cu pa e siguiente aña escolar nan tin seis klas yen, nan tin lista di spera pero nan ta tin’e na seis klas cu ta e bon cantidad cu nan por maneha e scol.
“Mi sa cu tin hopi peticion, cu nos a desapunta algun mayor, pero nos mester wak tambe e calidad den enseñanza y seis klas ta net e cantidad cu nos por handle”, meneer Lee a remarca.
El a mustra hopi orguyo pa su alumnonan: “Mi ta hopi orguyoso di nan, mi ta spera cu banda di nan cifranan, y tur loke ta e curriculum, hiba tambe loke cu nos a duna nan como persona, nan cualidadnan y habilidadnan y na esnan cu tin cu bay herexamen pa slaag, nos ta bay traha hopi duro pa bosonan, pa boso tambe logr’e pa nos duna bosonan e diploma cu boso merece”, Director di Colegio San Antonio a expresa.
