Nurianne Arias, docente di OGM na U.A: - ORANJESTAD (AAN) -- Dialuna 21 di Juni aki, lo tuma lugar e interesante actividad “OGM Carrier Event” cu ta bay ta online, y ta wordo organiza pa prome biaha, na Aruba.
“Organization, Governance, & Management”, ta un carera ofreci den e Facultad “Art & Science” di Universidad di Aruba.
Nurianne Arias, docente di “OGM” a amplia tocante e tema, den entrevista cu DIARIO.
Nurianne a splica cu solamente e evento aki ta dirigi pa e studiantenan actual, pero tur studiante cu ta puntra nan mes, si nan lo studia “OGM” kico nan ta bay haci? Kico e estudio aki ta encera?
E docente a menciona cu tin diferente graduado den e estudio aki di U.A, cu ta trahando den sector priva y sector publico, y cu tin un impacto grandi na Aruba, y ta den hopi publicidad, y Nurianne Arias kier a comparti esaki, como algo bunita pa inspira otro studiantenan cu sea ta na Aruba of afo, y cu por atende esaki online. Nan por tende di e graduadonan mes con nan a experiencia e estudio di OGM, na U.A y kico nan a haci despues como profesion, y como proyecto di bida tambe.
E evento aki ta online di 7or pa 9or di anochi, y tur hende por atende esaki na nan propio conveniencia, comodamente na cas.
Lo tin diferente orado: 6 pa 8 graduado di OGM, 4 pa 5 profesional den e veld di sector priva of sector publico, relaciona cu e programa “Organization, Governance, & Management”, cu lo amplia riba kico ta nan expectativa pa cu e studiantenan actual, specificamente ora nan bay haci nan pasantia y ora nan ta bay traha.
Tambe tin informacion riba un actividad pa un oportunidad di carera, cu un organizacion na Aruba, cu tambe lo ta den e evento menciona, dialuna anochi.
E docente a duna di conoce cu aworaki nan tin mas di 70 studiante di OGM mes, en total pa e di prome te di cuater aña, y tin e otro potencial diez pa 20 studiante di Aruba en general, cu lo por atende e estudio aki. Nurianne Arias ta spera cu hopi persona lo por atende e evento aki. Por tuma contacto via nan facebook page, unda tambe tin e formulario pa registra. E evento aki no tin ningun costo financiero. Pues e ta totalmente gratis y habri pa tur studiante, e anochi di dialuna proximo, 21 di Juni.
