Rebecca Roos ta organisa un 'documentary bootcamp'

Despues di dos edicion hopi exitoso

ORANJESTAD (AAN): Despues di dos edicion hopi exitoso, e Documentary Bootcamp ta bolbe zomer 2026: Dialuna 20 di Juli pa Diasabra 1 di Augustus.

Durante dos siman e participantenan ta siña tocante e arte di “filmmaking”. Usando e estilonan di documentario, lo siña con pa y lo produci un short film final.

Idioma di instruccion di e workshop ta Ingles, pero pa esnan cu tin problema cu esaki por tin extra splicacion na Papiamento, Hulandes of Spaño. E tayer ta guia pa Rebecca Roos, cu a duna varios tayer di filmacion ambos na Aruba y internacionalmente.

Durante e workshop e participantenan lo siña e principionan basico di filmmaking. E prome siman (dialuna te cu diasabra) lo ta dedica na "visual storytelling" y desaroyo di un storia. Na mes momento ta siña e basis di operacion di camera, audio y editing. Na un manera hopi interactivo e participantenan lo prepara nan propio proyecto pa pitch na final di e siman. Durante e di dos siman lo produci e proyectonan cu a gana e pitch, for di filmacion te cu editing, marketing y PR. Diasabra 1 di augustus e short filmnan final lo estrena durante un screening pa publico.

E tayer ta tuma lugar na Museo Arqueologico Nacional Aruba. E alrededor historico, e bario y e hospitalidad y partnership generoso di MANA a prueba di crea un ambiente inspirador pa e workshop hopi intensivo aki.

Edad minimo pa participa ta 17 aña y no tin mester di equipo di filmacion of computer pa participa, lo tin suficiente equipo pa tur participante traha optimal. Si bo tin bo propio equipo, naturalmente por trece esey tambe.

Varios participante di edicionnan anterior a sigui traha produccionnan, incluendo algun cu a gana premio. No perde e oportunidad aki!