Den cuadro di introduccion sistema electronico nobo:
ORANJESTAD (AAN): Recientemente Horacio Oduber Hospital (HOH) a introduci un sistema electronico nobo di pashent cu enfoke pa sigui eleva y mehora servicio na comunidad di Aruba. Un sistema electronico cu ta optimalisa procesonan di data y cuido dentro di HOH. Tambe e ta eleva eficiencia operacional y alabes mehora e calidad di cuido, pues un sistema integral.
Pa nos na HOH por brinda servicio eficiente ta importante pa tambe nos tin registra e number corecto di cada pashent, paso den futuro lo bay manda por ehempel recordatorionan via un SMS di bo cita pa haci un test of un cita cu un specialista y mas.
Yamada eDesk
E departamento eDesk actualmente ta yamando tur persona registra den e sistema na HOH pa asina verifica e number di telefon di e pashent. Esaki ta importante pa asina por comunica eficientemente y corectamente cu nos pashentnan.
HoH ta compronde cu privacidad di cada persona ta importante y alabes e cautela cu por tin na momento di ricibi un yamada pa verifica number y duna informacion personal via telefon. Pa e motibo ey ta informa comunidad di Aruba cu nos tin un accion di yamada andando cu e meta final pa tin informacion corecto di nos pashentnan.
Na momento cu ricibi un yamada di nos eDesk lo repasa solamente e informacion necesario pa controla e number di telefon cu tin registra. E number cu ta aparece ora di yama ta e number general di Hospital, esta 527-4000.
Mas informacion
Si bo tin cualkier duda na momento di ricibi un yamada semper por yama hospital bek via
527-4000 y pidi pa nan comunica bo persona cu nos eDesk. Pa mas informacion por subi www.arubahospital.com y klik riba “latest news” unda tin informacion di e accion aki den diferente idioma.
Cu e paso aki HOH ta desea di trece mas opcion den loke ta servicio den futuro cu e meta final pa eleva e calidad di cuido. Danki pe comprension y cooperacion pa nos logra esaki!
