Democracia como base directo di Status Aparte tin exigencia
*Herencia fiscal Gobierno Wever-Croes cu impacto social grandi
*Mas entrada pa e ciudadano y comercio ta reforza gobernacion
ORANJESTAD (AAN) — Na varios ocasion DIARIO a cuestiona e motibo cu Gobierno Evelyn Wever-Croes mester a bay cas prome cu e fecha cu tabata stipula pa proximo eleccion.
DIARIO a sostene for di prome momento, cu decisionnan cu Gobierno Wever-Croes a anuncia riba tereno financiero y social, lo a entrega Wever-Croes un triunfo electoral historico.
Esaki sin duda tabata e forma, cu Gobierno Wever-Croes mester a yega na conclusion di su maneho financiero, cu a scapa Aruba di un desastre financiero den cual e balor di Florin lo tabata directamente na peliger.
Si Gobierno Wever-Croes a keda na mando, e por a entrega cera e circulo di bon maneho financiero cu el a hiba, cu e momento cu Pueblo lo a cuminsa disfruta di e sacrificionan cu Pueblo a hiba pa scapa Florin cu tabata moribundo ora Gobierno Wever-Croes a asumi responsabilidad di gobernacion.
Manera a wordo anuncia, na 2025 e peso di belasting lo baha pa un 12 Mil cas di famia y pa 28 Mil persona, a base di e maneho nobo cu e proximo Gobierno lo hereda di Gobiern Wever-Croes.
Menos belasting pa Pueblo paga tin un impacto grandi pa un comunidad y directamente ta sostene e sector comercial, ya cu un grupo mas grandi di ciudadano tin mas placa pa gasta den comercio, cu na su turno lo progresa.
Ta hustamente e circulo den cual e ciudadano tin oportunidad pa gasta mas den comercio, ta forma e circulo democratico di un pais liber, caminda un comercio cu bon entrada ta duna oportunidad di trabou y asina di entrada na miembronan di comunidad, cu ta paga belasting y na nan turno ta sostene e necesidad financiero di nan pais.
Gobierno Wever-Croes ta despedi cu un logro social enorme pa Pueblo di Aruba cu tin mas placa awor disponibel pa por sostene comercio, cu lo tin mas placa pa inverti den gastonan pa personal, cu finalmente ta nifica mihor entrada pa Pueblo y caha di Gobierno, cu ta encarga cu bienestar general!
