ORANJESTAD (AAN): E plannan pa converti ex-Dump na Parkietenbos den un Parke di Energia Solar,
ta un proyecto cu a cuminza wordo ehecuta desde luna di Maart 2022 caba. Esey ta loke recien Ministro Demisionario Ursell Arends a indica den un entrevista.
For di ora cu Gobierno a cera e portanan di e Dump tambe, diferente otro paso den cuadro di e proyecto aki a sigui. Na 2024 a haci peticion pa obtene e permiso di ‘Hindervergunning’ pa asina cuminsa oficialmente cu e proyecto di sanea e dump di Parkietenbos.
E proyecto ta parti den tres fase. Ministro Arends a splica cu Fase 1 ta pa sanea e parti di asbestos. Fase 2 ta poni pa perfila henter e sero di sushi. Fase 3 ta e parti caminda cu lo pone un capa final riba e sero, pa asina e por wordo comberti den un Parke Solar.
Na fin di 2024 a tuma lugar e destaho publico y awor e comision cu a wordo apunta cu ta consisti di Witteveen+Vos, cu ta Instituto Hulandes cu ta guia Aruba y yuda traha full e bestek di e proyecto hunto cu profesionalnan di Aruba di DNM, DVG, DTI, Serlimar, y un representante di Ministerio a traha riba e proyecto aki pa asina e por cuminza.
E ta un proyecto riba cual tin 18 miyon Florin aloca pa haci esaki posibel. Por mira cu ya caba rond di Dump na Parkietenbos tin un cura nobo cu ta wordo traha, pa asina ofrece seguridad eyriba. Tambe a traha plan di medio ambiente, y tambe di e plan di salud y seguridad hunto cu e profesionalnan pa atende tur e Fasenan di proyecto pa e cana debidamente.
Segun e Ministro Demisionario, awor ta bay cuminza traha riba e Fase 1 pa atende e peligro di Asbestos, y e lo bay dura 5 luna. Despues ta sigui cu e proyecto di perfila henter e sero, y esey lo bay dura 15 luna di tempo. Unavez cu esey ta cla, e capa final lo bin riba e sero.
Pa e ora ey, pa 2026 y cuminsamento di 2027 e proyecto lo wordo termina y asina Dump di Parkietenbos a wordo completamente sanea. Despues di asina hopi decada, e Dump di Parkietenbos lo bay bira algo di historia!
Gobierno nobo cu ta sinta, por sigui cu e proyecto pa haci’e un Parke Solar of otro cos.
