Un aumento significativo durante 2024
*A exporta 1.070 ton pa Aruba y 2.357 pa Corsou
ORANJESTAD (AAN): E camara di comercio di La Vela na Coro (Venezuela) a informa un aumento significativo den e exportacion pa Aruba y Corsou durante 2024. Segun e cifranan publica, un total di 3.427 ton di producto a wordo exporta via e waf aki, loke ta nifica un incremento di 27,16% compara cu 2023.
Di e total di exportacion pa 2024, 68,77% (2.357 ton) tabata pa Corsou, mientras cu 31,22% (1.070 ton) tabata destina pa Aruba, segun a declara Juan Gotopo, vicepresidente di e grupo comercial. E aumento den exportacion ta refleha un desaroyo positivo despues di e re-apertura di e frontera maritimo na 2023, cu a marca e reinicio di e relacion comercial entre Falcón y e islanan ABC.
Productonan exporta
E productonan cu a forma parti di e exportacion no ta solamente limita na fruta y berdura, sino tambe a inclui: keshi, mata, pochi mata, carbon vegetal, mangel, pisca, abono, azeta di coco y material di construccion.
E crecemento di exportacion ta un indicacion cla di un intensificacion di e relacion comercial entre Falcón y e islanan ABC, y tambe ta beneficioso pa e comunidad comercial local di La Vela na Coro.
Gotopo a resalta cu e cifranan positivamente ta mustra no solamente un stabilidad economico, sino tambe un demanda continuo pa producto venezolano na Aruba y Corsou, fortaleciendo asina e laso economico entre e regionnan.
