Reapertura di e Taxiway Golf lo alivia e proceso operacional na aeropuerto

Minister Wendrick Cicilia:

ORANJESTAD (AAN): Diabierna, 24 di october, a tuma luga e apertura di Taxiway Golf despues di a pasa den un proceso di renobacion. Dia, 23 di october, a haya aprobacion di parti di Departamento Aeronautico Civil, despues di diferente proceso di inspeccion pa asina por haya aprobacion pa e Taxiway Golf por ta operacional. Minister di Turismo, Transporte y Labor, Wendrick Cicilia, tabata presente pa e cortamento di cinta cu a tuma luga conhuntamente cu CEO Interino, James Fazio.

Tabata den luna di augustus cu a inicia trabou di rehabilitacion di e Taxiway Golf cu tabata construi na aña 1997.

 “Apertura di e Taxiway Golf ta parti di nos efuersonan pa prepara pa e 'Winter Season’ mirando cu e demanda pa e uzo di nos facilidadnan na aeropuerto lo aumenta”, asina Minister Wendrick Cicilia a expresa.

Durante e temporada nos dilanti lo tin mas aumento di vuelo, pues lo tin mas trafico aereo na nos aeropuerto. Apertura di e Taxiway Golf lo alivia e proceso operacional y lo garantisa mas fluho di e aerolineanan. Esaki ta den cuadro di e esfuersonan pa prepara e high season cu ta na caminda cu ta priminti di ta exitoso pa Aruba.

Minister Wendrick Cicilia a duna di conoce cu lo agrega un di 6 security lane den luna di november pa facilita e fluho di pasahero pero tambe pa haci e experiencia di e pasaheronan mas agradabel.

Por ultimo Minister Wendrick Cicilia ta gradici tur esnan cu a forma parti di e ehecucion di rehabilitacion di Taxiway Golf.