Arumil ta buscando candidatonan pa bira Militar

Militar di Arumil señor Geerman ta indica:

ORANJESTAD (AAN) Den entrevista cu Matutino DIARIO, señor Geerman, Militar di Arumil, a duna di conoce cu Arumil ta buscando candidato pa haci e opleiding, pa bin traha como militar.

   Logicamente, esaki ta rekeri di sigui un opleiding na Curacao. E no ta manera hendenan tabata pensa prome, cu e ta encera un obligacion di haci servicio militar sino cu e ta un trabao. “Manera bo cuminza cu e opleiding bo ta inicia cu un scale y ta wordo paga. Bo ta firma un contrato di cinco aña manera ambtenaar. Ora bo caba cu e opleiding tin diferente opcion, specialidad, entre otro den e parti medico, y por subi di ramo segun e diferente opleidingnan cu bo por haci”, Geerman a splica.

   El a bisa cu esaki ta un trabao hopi ameno, y e ta basicamente un “win-win situation”, pasobra e ta mantene bo ocupa y bo cabes tambe pasobra bo ta haci diferente estudio, cu den futuro pa bo mes enseñanzanan.

   Tocante su mes persona, señor Geerman a sinti su mes motiva pa drenta den tereno militar, pasobra e ta un persona cu a haci deporte, y semper el a gusta challenge su mes. Un dia el a wak amigonan cu tabata den Kazerne caba y e tambe a bin test, locual no ta facil pero mester kier training, sigui e opleiding y asumi reto.

   “Aworaki mi ta hopi gradici cu e trabao pasobra mi a yega na hopi cos, mi a logra hopi na mi edad cu ta hopi jong. E trabao aki ta yuda bo desaroya bo mes den diferente sector”, Geerman a señala.

   Pa drenta studia pa Militar mester tin entre 17 cu 25 aña di edad, MAVO Diploma of EPB doorstroom, y paspoort hulandes valido y naci den e sistema Hulandes. Despues cu cumpli cu tur e rekisitonan aki, ta sigui un trayecto cu ta encera, entre otro, testnan di salud y test psicologico, pa por drenta haci e opleiding, pa cuminza cu e Carera Militar.

  Otro siman, dia 28 y dia 30 di October, di 9’or di mainta pa 2’or di atardi, e hobennan cu ta interesa ta bonbini na Mariniers Kazerne, y igual e mayornan y tur otro bishitante cu por haya e informacion, y podise pase pa otro persona cu no por tabata presente. E opleiding ta cuminza na final di Augustus 2026, cu e aña escolar a termina caba, y bo a slaag prome cu e opleiding inicia.

   “Hende homber y hende muher por solicita, contal bo ta den e edad, y cumpli cu e rekisitonan ya menciona. Tambe por comunica via Facebook of Instagram, y na Arubaanse Militairen por haya hopi informacion”, señor Geerman a duna di conoce.