Re-acreditacion JCI di ImSan ta un logro grandi pa cuido di salud na Aruba

Fraccion di AVP ta impresiona

ORANJESTAD (AAN): Fraccion AVP ta felicita Instituto Medico San Nicolas (ImSan) cu e logro importante di a obtene su re-acreditacion como hospital door di Joint Commission International (JCI). Diabierna, 14 di augustus, parlamentario Jennifer Arends-Reyes y Dennerich Kelly a representa Fraccion AVP durante e celebracion oficial na ImSan.

   E re-acreditacion, cu ta valido for di 25 di juli 2026 te cu 24 di juli 2029, ta confirma cu ImSan ta sigui cumpli cu normanan internacional exigente den areanan manera calidad di cuido, siguridad di pashent, prevencion di infeccion, maneho di medicamento y funcionamento general di e institucion.

   “Esaki ta mas cu solamente un certificado. E ta representa confianza pa cada pashent y famia cu ta acudi na ImSan pa cuido. Tambe, e ta un reconocemento di e disciplina, dedicacion y profesionalismo di tur empleado cu diariamente ta pone bienestar di pashent na promer luga,” Fraccion AVP a declara.

   Desde su acreditacion inicial na 2023, ImSan a sigui posiciona su mes como un institucion importante den cuido di salud na Aruba y den region. E re-acreditacion ta demostra cu calidad no ta un meta cu bo ta alcansa un biaha so, sino un compromiso cu mester wordo manteni y mehora continuamente.

   Fraccion AVP ta extende un felicitacion sincero na directiva, tur dokter, nurse, personal medico, tecnico, administrativo y di sosten, como tambe na tur partner cu a contribui na e resultado aki. Cada persona a cumpli un rol importante den e exito colectivo.

   Pa Fraccion AVP, cuido di salud sigur, accesibel y di calidad mester keda un prioridad nacional. Inversion den nos profesionalnan, tecnologia moderno, capacitacion continuo y bon cooperacion entre nos institucionnan medico ta esencial pa sigui fortalece e servicio cu pueblo di Aruba ta merece.

   “E re-acreditacion di ImSan ta un logro pa San Nicolas y pa Aruba henter. E ta mustra loke nos por logra ora vision, dedicacion y compromiso cu excelencia ta bay man den man. Pabien na ImSan y henter su team cu e logro prestigioso aki.”