Minister Ursell Arends ta comenta parti di e rapport di PWC pa Serlimar:
ORANJESTAD (AAN) – Den entrevista cu DIARIO, Minister Ursell Arends, como Minister di Naturaleza, el a comenta cu e rapport di PWC a analisa y a duna accionnan cu mester wordo tuma, tanto na termino corto, como mediano y largo.
Nan a parti esaki den tres categoria, y esun prome ta e maneho di desperdicio, y esaki den cuatro accion cu mester a tuma lugar; e vision a wordo presenta cu ta cu Aruba mester bay di un economia lineal na uno circular. Asina e companianan a cuminsa 'tackle' e desperdicionan cu nan ta kere cu nan por procesa adecuadamente, crea materia prima di esaki, tanto pa uza localmente, como pa exporta.
E mandatario a señala cu mester adapta e rol di Serlimar den henter e trayectoria, pa loke ta trata maneho di coleccion y procesamento di desperdicio.
Arends a indica cu den e periodo aki Serlimar a cuminza colecta, y aworaki nan ta preparando cu un partner cu nan a identifica, nan a identifica e desperdicio cu nan kier procesa, y combersacionnan ta andando pa cuminsa atende cu esaki tambe.
El a agrega cu mester a adapta e rol di Serlimar pa loke ta trata ceramento di e dump di Parkietenbos. “Esey a wordo prepara, y dicidi cu Serlimar ta hunga un rol te na final di 31 di December 2022, cu a cera Parkietenbos. E mesun trahadornan ey a haci un preparacion caba riba e tereno, y mi ta kere cu den e siguiente simannan lo bay anuncia e compania cu a gana e destaho publico, pa cuminza sanea e dump di Parkietenbos.
E prome area cu lo atende cu ne ta asbesto y si tur cos ta bon e otro siman, e compania cu gana e biding aki mester wordo conoci. Tambe a haci caba un destaho publico, pa cera e cura completamente, rond di Parkietenbos, y esey tambe lo cuminza alrededor di e proximo simannan y tin adelanto riba dje”, e dignatario a duna di conoce.
Minister Arends a agrega cu mester haci un opcion riba dje, pa loke ta trata kico ta e “Juridische Form” di Serlimar, y a scoge cu ta keda un suigeneris.
El a subraya cu esaki ta e prome parti, e di dos ta pa crea un base financiero pa Serlimar, y aki e rapport a identifica seis punto. E prome ta cu e compania mester bira financieramente para riba su pia, locual tambe a tuma lugar, segun e dignatario.
