ORANJESTAD (AAN): Diahuebs mainta Parlamentario Otmar Oduber a cuminsa un caso contra Gobierno di Aruba,
Parlamento y tambe Alfred Sneek, Jennifer Reyes, Evelyn Wever-Croes y Gino Goeloe. Abogadonan mr. Illes y mr. Carlo a representa Oduber.
E caso ta relaciona cu e decision di Comision Central di 20 Maart 2025, caminda ta prohibi Oduber viaha pa diferente actividadnan Parlamentario.
Mina proceso democratico: E abogadonan di Oduber ta haya cu e decision aki ta haci cu e 3.538 votadornan di Oduber riba lista di PPA, no ta wordo representa completo y efectivo den Parlamento di Aruba.
E abogadonan a bisa Hues cu door di exclui Oduber, un gran parti di comunidad ta worde nenga. Esaki ta trece cune un deficiencia democratico cu e riesgo cu un parti di comunidad ta perde confianza den e proceso politico. Esaki ta mina e proceso democratico y e efectividad di Parlamento den su totalidad.
Reunion importante di Reino: E abogadonan a mustra cu otro luna, September 2025, tin un reunion Interparlamentario di Reino (IPKO) y ta inaceptabel cu door di e decision di 20 Maart 2025, Oduber no por participa.
Na opinion di e abogadonan, asuntonan importante pa Aruba lo worde trata den e reunion (IPKO) y fraccion di PPA, representando tur e votadornan, no por expresa su mes den e forum crucial aki.
No por tuma medida contra Oduber: E abogadonan ta haya cu Comision Central ta viola e principio di legalidad ya cu no tin base legal pa e decision di 20 Maart 2025.
E abogadonan a mustra cu den pasado, Legislacion conciente a scoge den e LIM (Landsverordening Integriteit Ministers) e (AB 2021 No. 2023) pa tuma medida contra ministernan cu ta worde sospecha di a haci cosnan castigabel. Na opinion di e abogadonan, Parlamento no tin e ley aki y como tal no ta aplicabel pa e Parlamentarionan. E abogadonan ta haya cu Comision Central no por tuma e medida contra Oduber.
E abogadonan a mustra cu Oduber a protesta contra e medida aki pero sin resultado.
Caso Curaçao a boycot parlamentario: E abogadonan a mustra riba un caso na Curacao di 2020 caminda a boycot e nombramento di un Parlamentario nobo.
Den e caso ey, Corte di Curacao a señala cu tabatin un boycott cu no tabata basa riba hechonan legal. Hues di Corte di Curacao ta haya cu e derecho di voto di e votadornan ta worde viola.
E abogadonan ta haya cu ta e mesun situacion tin cu Oduber.
Mester prohibi Gobierno y Parlamento: E abogadonan ta haya cu tin motibo di urgencia den e caso aki y ta pidi Huez pa prohibi Parlamento y Gobierno, uza e decision di 20 Maart 2025, contra Oduber y pa Hues ordena Gobierno y Parlamento pa laga Oduber por atende tur reunion y actividad Parlamentario.
Tambe e abogadonan ta pidi Hues pa ordena Gobierno y Parlamento pa Oduber por forma parti di comisionnan y representacion internacional.
Despues di a scucha e defensa di parti di Gobierno, Hues a bisa cu e ta bay studia e caso y dia 7 September 2025 lo tin sentencia.
