ORANJESTAD (AAN) – Ronald Van Trigt, presidente di e asina yama “Commissie Kosten Besparing voor de Medische Zorg”, apunta pa Minister di Salud na Februari ultimo,
pa busca alternativanan encuanto e bahamento di gastonan den cuido, a sigui declara con conferencia di prensa, cu miyones y miyones di florin a wordo corta di berdad riba cuido medico.
Saliendo for di e datonan di e cuenta anual di AZV nan a corta no menos cu 35 miyon durante aña 2020, di cual gran parti ta for di esnan representando cuido, manera Hospital, ImSan, docternan di cas, specialistanan, Respaldo, y henter e sector di cuido a wordo atacha door di e 5.5% aki.
Van Trigt a agrega cu na Januari AZV a wordo bisa cu, simplemente, sigui riba e ritmo aki lo tin consecuencianan serio pa continuacion di cuido di calidad na Aruba.
Na e momento ey, Minister di Salud, pa medio di Parlamento a duna mandato pa un Comision wordo forma, y esaki a consisti di casi tur e participenan den cuido na Aruba. Van Trigt a indica cu e ta un comision sumamente grandi, extenso, y su persona a wordo nombra pa presidi e comision aki, como un presidente independiente cu no ta directamente envolvi cu cuido.
E proceso aki, Van Trigt a expresa, e ta un momento unico esnan den cuido a realiza cu nan mester para hunto y nan a haci esey tambe.
El a menciona cu e rapport cu a wordo entrega door di cuido ta uno hopi extenso cu yama “Cuido di nos cuido” y e ta un documento cu tin e sosten unanime di henter e grupo, cu ta representa e sector di salud.
Den dje tin un vision, con cuido na Aruba mester ta pa e añanan nos dilanti, y ta wordo papia di cambionan structural te cu aña 2030, y ta indica con cuido mester bin, pero den esey tambe ta splica con, structuralmente, mester haci adaptacionnan pa esaki ta sostenible.
E punto di discusion cu si ta keda, naturalmente, ta cu tin un decision firma pa gobierno di Aruba y exigi door di Hulanda, cu den un corte termino (pasobra e cortamento a cuminza for di Juli 2020 caba), mester sigui corta den salud, mensualmente.
Esaki ta algo cu tambe den e rapport a pone hunto, y nan ta cuestiona fuertemente e consecuencia di cortamento na e manera aki, pasobra den corto tempo, esey kiermen cu no por haci otro cu haci hopi dolor. Pa e motibo aki a zorg, for di nan posicion di preocupacion a bin hunto y a forma esaki.
