Maltrato pisa riba Miss Turismo di Mexico cu mester bin competi na Aruba

MEXICO CITY: Via di su social media, e dama Vanesa Arcique, kende recien a wordo corona como Miss Turismo Mundial Yucatán 2021,

a pone un informacion cu hendenan a atake brutalmente, mientras cu e tabata haci ehercicio na un Parke di Merida (Mexico) den weekend di siman pasa.

   Segun e dama di Yucatan, encuanto e maltrato cu el a pasa aden, el a pone potret di e atake violento cu el a bira victima di dje na man di tres muher, y djis pasobra e ta un reina di beyeza.

   E mensahe cu el a skirbi ta cu mescos cu tur dia, el a bay jog den e Parke como parti di su rutina di ehercicio.  Ora di bin bek, un grupo di tres muher a cuminza dal e, y a trata di desfigura su cara gritando cu e “merece esey pa ta un reina di beyeza”.  E victima a bisa cu e no conoce e muhernan, y no sa kende nan ta.  E no por a mira nan cara, pasobra e victima a cubri su mesun cara pa defende su mes di e golpinan.

   “Pa mi defende mi mes di e golpinan, mi a trata na tapa mi cara lo mihor posible, pero toch nan a sigui dal mi, y mi no a logra mira kende nan ta.”

   “Mi por a pensa cu mi a wordo agredi pa un homber, pero ta lamentable y tristo cu e violencia aki a bin for di muhernan.”  El a bisa cu esaki ta algo cu e no ta desea pa ningun hende pasa den dje.

   Mientras tanto e website di Miss Turismo Mundial Yucatán a lamenta e susedido, y agresion cobarde riba nan participante na e Parke, djis pasobra e ta un reina di beyeza.  “Tristo ta e realidad cu nos representante ta biba aden djis pa haci di forma corecto su trabao como reina, y e ta inocente di tur cos, no ta su culpa pa trata na crea un mihor reinado pa mehora Yucatán, y na final ta e envidia ta bin ta ganando, y lo mas tristo ta cu nan tabata muher!”

   Vanessa Arcique lo representa Turismo di Mexico den e certamen internacional di “Miss Tourism World 2022” cu lo tuma lugar na Aruba.

   Te cu Diabierna, no a drenta informacion si acaso e victima di 20 aña a denuncia e maltrato pisa aki na autoridadnan di Ministerio Publico na Estado di Yucatán.