Rapport anual di AAA NV ta refleha e deseo cu tin pa acelera progreso

Ministro Wendrick Cicilia:

ORANJESTAD (AAN): Durante e reunion di e accionistanan di Aruba Airport Authority N.V., a presenta y trata e cuenta anual di 2025, un momento importante pa reflexiona riba con e compania a maneha e ultimo aña y e direccion strategico cu a tuma.

   Segun Minister Wendrick Cicilia, e reunion a confirma cu 2025 tabata un aña marca pa progreso, disciplina y aceleracion. For di principio, Minister Cicilia a drenta cu un mentalidad determina y a comunica claramente cu liderazgo, gerencia y Hunta di Supervision mester traha den un solo direccion: fast track y entrega resultado concreto.

   Un di e prioridadnan principal tabata acelera e proyecto Gateway 2030. Esaki a exigi alineacion entre tur partner y stakeholder envolvi. Awe, e cuenta anual ta mustra claramente cu e aceleracion di e proyecto ta visibel den ehecucion, cu Fase 1A ya finalisa y cu Fase 1B ta avansando riba un caminda positivo danki na esfuerso colectivo entre liderazgo di AAA, contratistanan y e Ministerio di Turismo.

   Durante e reunion, Minister Cicilia a expresa su aprecio pa e colaboracion y compromiso demostra pa cumpli cu e peticionnan di Gobierno di Aruba. Esaki inclui enfoke riba maneho di forsa laboral local, cu enfasis riba retene, forma, cuida y promove profesionalnan local den sector di aviacion y operacion di aeropuerto.

   Tambe a destaca e preparacion conhunto cu e autoridad di aviacion civil pa e audit di International Civil Aviation Organization, un proceso importante pa certificacion y reputacion internacional di nos aeropuerto. Aruba ta continua traha pa mantene cumplimento cu regulacion y standardnan internacional, protehando e posicion di nos aeropuerto den mercado global.

   Entre e logronan importante resalta den 2025 ta: (*) Finalisacion di Fase 1A di Gateway 2030. (*) Instalacion di un di seis lane adicional di siguridad na Checkpoint Alpha.  (*) Implementacion di gate automatisa pa inmigracion y eliminacion di proceso manual di scanning di boarding pass, mehorando eficiencia. (*) Reapertura di Taxiway Golf. (*) Inversion conhunto cu U.S. Customs and Border Protection den tecnologia biometrico pa optimisa experiencia di pasahero. (*) Atencion special pa e trahadonan di inmigracion cu material y ekipo nobo pa aumenta comodidad den trabao.  (*) Un acuerdo renoba cu Royal Schiphol Group pa contribui na aceleracion di progreso y desaroyo.

   Minister Cicilia a expresa confianza den e liderazgo ehecutivo di AAA N.V., describiendo e organizacion como un di e entidadnan strategico nacional mas importante pa economia, turismo y bienestar di Aruba.

   “Nos aeropuerto ta e prome y ultimo impresion di Aruba. Inverti den calidad, eficiencia y recurso humano local ta esencial pa nos reputacion internacional y pa e futuro di nos isla,” Minister Cicilia a finaliza bisando.