Rapid Response Team lo mehora e servicio pa pueblo

Minister di Infrastructura:

ORANJESTAD(AAN): Durante un conferencia di prensa di DOW Minister di Infrastructura Rene Herdé a duna di conoce cu e trahadornan di DOW y City Inspector ta cla pa sali haci e trabaonan necesario rond di nos isla.

   “Masha danki di antemano pa boso trabao”. E peticion pa un Rapid Response Team no mester sorprende ningun hende, pasobra tin cosnan ta sosode tin biaha riba caya manera un accidente unda cu un auto ta dal den un palo di lus. Elmar mesora ta wordo haya pero tin biaha tin otro dañonan unda cu mesora hende ta pensa riba DOW, segun e mandatario. El a sigui bisa cu despues cu a bin e peticion aki pa un Rapid Response Team, DOW mesora a bula riba dje, usando su propio material y su propio hendenan hunto cu City Inspector.

   Segun Herdé, esaki a pone cu no mester a bay crea un organisacion nobo. “Esey ta mustra riba e flexibilidad cu tin den nos organisacionnan pa haci mas trabao cu e mesun cantidad di hende”. Cu e organisacion ta asina flexibel cu e tin e profesionalnan y e ekipo pa haci mas cos cu e mesun capacidad ta un adelanto, segun e minister. El a indica cu esey ta specialmente un adelanto den servicio pa comunidad. “

   DOW ta pasando door di hopi cambio”. Nos a inicia cambio paden y nos a pidi nan pa haci un cantidad di cos cu ta nifica cu tin mester di mas hende, mihor organisacion y nos ta den e proceso aki, segun Herdé, kende a splica cu e Rapid Response Team aki ta djis un ehempel di con e servicio mester mehora y tur hende den DOW ta di acuerdo cune.

   El a duna di conoce cu e bureau di minister ta dispuesto pa yuda den tur aspecto y lo papia tambe cu minister Geoffrey Wever pa yuda den esaki.

   Herdé a sigui bisa cu e intencion ta pa pueblo por yega rapidamente na e Rapid Response Team y pa e team reacciona lihe tambe.