Cumpra bo Pay-Per-View di SMAC y Stichting Musica facil y rapido awo via WhatsApp

Setar a indica caba

ORANJETAD (AAN): Hopi hende mester por a realiza, cu otro siman Diaranson y tambe Diahuebs lo tin e prome Pre-Finals di Soca Monarch 2027.  Como cu Carnaval lo ta hopi trempan den Februari, a dicidi na cuminza tene eventonan ya pa algun dia durante luna di November.

   Awor Setar a anuncia cu e Pay-Per-View (PPV) pa disfruta di e actividadnan di Carnaval 73 y Caiso & Soca Monarch ya ta disponibel na benta.

   E aña aki, Setar ta introduci e opcion di cumpra bo PPV via Setar su WhatsApp Self-Service na cualkier momento di un manera hopi facil y lihe. Manda un mensahe di WhatsApp na 525-1002 y sigui e instruccionnan di e sistema automatisa pa selecciona y cumpra e pakete cu bo ta desea.

   E servicio aki ta brinda bo mas facilidad y flexibilidad pa cumpra bo PVV, sin necesidad di yama Setar of warda riba un agente disponibel.

   Pa e temporada di Carnaval 73, Setar ta ofrece dos pakete di PPV, cada un cu su propio actividadnan.

   E pakete di Caiso & Soca in Yuh Back Yard ta inclui Prefinals di Soca, Final di Soca y Final di Caiso, y e pakete di Ambiente den 73 ta inclui e actividadnan di Carnaval 73 manera Eleccionnan di Reina, Tumba Aruba, Calypso & Roadmarch y Tumba Infantil y Hubenil.

   E dos paketenan di PPV ta disponibel via Cable TV of streaming. Clientenan cu ta desea di disfruta di e actividadnan via television mester tin un pakete di Cable TV activo, esta Digital Cable, IPTV of Setar Complete. Clientenan cu tin solamente Analog Cable no por wak e PPV via Cable TV.

   Ademas, clientenan cu ta prefera streaming por cumpra nan pakete di PPV directamente riba nan website di PPV, cu e opcion pa paga cu credit card of via Pay.aw.  Pa pago cu Pay.aw, ta importante pa verifica cu bo tin suficiente saldo disponibel den bo wallet di Pay.aw.

   Haci uzo di e WhatsApp Self-Service via 525-1002 pa cumpra bo PPV y disfruta di e emocion, talento y ambiente di Carnaval 73, unda cu bo por ta y for di e comodidad di bo cas.