RAft pa Aruba ta revela e peliger revela pa Raad van State

DIARIO ta uza COHO como prueba di inhusticia Reino contra Aruba

• E organo halto di Reino a bay contra COHO pa desaroyonan di awe
• Raymond Knops impresiona cu e logronan di Gabinete Wever-Croes 

ORANJESTAD(AAN)- Na caminda pa eleccion Hulandes na November 2023, cu por nifica un cambio total den mundo politico na Hulanda, Gabinete Mark Rutte a cende un candela sumamente peligroso den e base di Relacionnan den Reino.

Mescos cu Aruba, Reino Hulandes mester tene su mes na e orden di Ley y mester evita cu hasta e impresion ta wordo crea, cu Statuut ta wordo abusa y asina un pais ta bira victima di decisionnan di politiconan Hulandes.

Ta hustamente e peliger cu e cuadro di Leynan cu ta dicidi pa e autonomia di Aruba, tabata uno di e motibonan mas grandi cu Raad van State na Hulanda, a bay contra e concepto di COHO den cuadro di e garantianan cu Statuut ta regla pa paisnan di Reino Hulandes.

Pa comprende e realidad di e RAft cu a wordo impone dor di gobierno demisionario, pues e Gobierno Mark Rutte cu ta na caminda pa cas prome cu su tempo pa bay a yega, mester bay na e posicion mas fuerte cu Reino a yega di presenta den supervision cu tabat COHO pero tambe na e forma cu Aruba ta wordo goberna actualmente.

E resultado concreto di gobernacion di Aruba, ta e factor determinante pa Reino Hulandes interveni cu bon motibo legal pa haci esaki.

Gobernacion di Aruba mester ta faya y mester ta tuma lugar contra bienestar di e pais, pa Aruba wordo pone bou supervision.

Loke ta na wega actualmente no ta e partidonan cu ta forma Gobierno di Aruba, pero e seguridad cu e cuadro di Ley di Reino Hulandes ta wordo respeta sigur dor di instancianan cu e leynan di Reino ta duna e arma pa actua na bienestar di e ciudadanonan di Aruba den caso cu Reino por pone prueba riba mesa cu e Gobierno di Aruba ta faya den su maneho cu e ciudadano Arubano.

Pa comprende riba kico supervision ta basa, mester sigur tuma nota di e oposicion di Raad van State contra COHO, cu ta bay contra e principio di defensa di e estado di derecho cu mester respeta.

E conclusionnan di Raad van State enfrente COHO tabata mustra cu e obhetiva di COHO tabata pa hunto cu e Ministronan di Reino por introduci control financiero mas pisa riba uno di e paisnan di Reino den Caribe.

Uzo di e autoridad aki no solamente lo a wordo haci si e no ta cumpli cu e colegio di COHO na forma suficiente cu e ley di Reino, pero tambe si e Ministro encarga cu Relacionnan den Reino ta haya cu e tin un motibo pa esaki.

Den su presentacionnan Raad van State, a trece dilanti cu Coho ta bat contra e autoridad di gobiernonan di un pais.

E pregunta grandi ta keda awor, a base di kico Gobierno Hulandes na e momentonan aki ta nenga Aruba un prestamo a menos cu e bay di acuerdo cu e concepto di RAft, cu ta significa cu Gobierno di Aruba ta bay di acuerdo cu un cambio, cu por nifica cu e ta entrega e soberania di e pais na un forma cu den e actual situacion di Aruba no ta cuadro cu castigo pero cu aplauso.

Pues un exigencia di Gobierno di Reino, cu hasta por wordo mira como un arma contra e Gobierno eligi y Parlamento di Aruba, den un tempo di crisis pa Gobierno di Reino ta wordo utilisa contra Aruba.

Prueba ta indica cu for di 2020 Aruba a alcansa un presupuesto cu e saldo favorabel cu Reino a exigi y cu ta Covid-19 a destrui economia di Aruba cu a wordo cera y mescos cu a socede rond mundo, planificacion financiero di Aruba, cu mientrastanto a recupera y ta traha completamente den cuadro di e exigencianan di bon gobernacion manera Reino mes mester admiti.

Importante ta, cu hasta ex Ministro Raymond Knops mes a expresa su satisfaccion directo na November 2022 na Prome Ministro di Aruba, pa e logronan den maneho di e pais, manera a keda publica.

Cu prueba DIARIO lo sigui defende e bienestar di Aruba cu a lucha pa su soberania y sigur no por wordo expone na supervision sin motibo dor di e politiconan di e partner den Reino, Hulanda, sin suficiente motibo.

DIARIO ta sigui presenta pruebanan palpabel pa bay contra loke ta pasando y lo sigui uza sigur e posicionnan di instancianan oficial, cu ta sumamente importante pa e mantencion di e cuadro di Ley cu ta conta pa gobernantena ni Reino tambe den e democracia constitucional di Aruba, cu prensa mester defende!

RAft no por conta pa Gobierno Wever-Croes cu ta tene su mes na reglanan di bon gobernacion a base di e cuadro di ley di Aruba cu mescos cu Hulanda y tur pais na mundo mester a enfrenta di desastre total doi Covid-19 despues di a logra e presuesto cu un saldo positivo na 2020.