ORANJESTAD (AAN): Radisson Blu Aruba a ricibi e prestigioso certificacion LEED di U.S. Green Building Council (USGBC), y asina a bira e prome hotel na Aruba pa logra e certificacion LEED.
LEED (Leadership in Energy and Environmental Design) ta consisti den un grupo di sistemanan di clasificacion pa e diseño, construccion y operacion di edificionan ecologico di alto rendimento. Esaki ta un proceso habri y transparente cu ta traha pa yega na sostenibilidad, un medio ambiente berde y preservacion di salud humano.
“Nos ta hopi orguyoso di e logro aki”, seguno Luigi Wix, Gerente General di e resort. “E certificacion LEED ta demostra e impacto mas chikito cu e diseño y construccion di nos hotel tin riba medio ambiente, ademas di valida nos compromiso di ta un hotel sostenible. E conciencia riba medio ambiente ta hopi importante pa nos turistanan ora di scoge un hotel, y nos ta spera di duna un bonbini na huesped y gruponan cu ta comparti nos standard halto di cuido di nos medio ambiente”.
Radisson Blu Aruba a habri su portanan na April di aña pasa cu 132 suite di hotel y 76 condominio residencial. Nan a implementa varios caracteristica y practicanan sostenible tanto den proceso di construccion como den operacionnan diario pa obtene e certificacion LEED.
Algun ehempel con e hotel a logra esaki tabata enfocando riba eficiencia di energia, pasobra esaki ta e aspecto mas importante di un edificio sostenible. Radisson Blu Aruba tin un sistema di aire acondiciona automatiza avanza den nan cambernan y Club House, y ta usa solamente luznan LED.
E hotel tambe ta recolecta awa di sistema di aire acondiciona y ta proces'e pa usa esaki den nan sistema di irigacion. E hotel nobo riba Palm Beach ta conta cu paisahenan bunita, cu ta integra flora y fauna local.
Otro operacionnan consciente di sostenibilidad di e hotel ta inclui reduccion di consumo di awa, uso di productonan di limpieza cu ta safe pa medio ambiente, como tambe cambia e boternan di shampoo y habon di un solo uso, pa esnan cu por wordo yena bek.
