ORANJESTAD (AAN): E artista contemporaneo Nelson Gonzalez, bou di e curaduria di Fabian Gonçalves Borrega,
ta presenta un coleccion di potret nobo na Aruba Photo Room at the Talk of the Town Hotel & Beach Club na Oranjestad, dia 15 di april. Esaki ta habri 7or y mey di anochi.
E obranan fotografico cu Gonzalez ta trece, ta un serie cu originalmente a worde captura riba celuloide di 35 MM, 20 aña pasa. Na aña 2000 González a cuminsa crea un archivo personal, documentando su biahenan y wardando e negativonan. E proceso aki a tuma lugar te na su migracion na Aruba aña 2003.
Temporada aki, mundo digital a laga atras tur formato analogico, por lo tanto e archivo di Gonzalez a keda obsoleto y perdi pa casi dos década, e maltrato di e tempo riba un material asina sensitivo, ta e contribucion pa e presenta ISO 20 como un proyecto artistico, ya cu originalmente a worde pensa como archivo.
Despues di 20 aña e proyecto aki por worde mira pa prome biaha, den forma di exhibicion, NFT y photo book, no unicamente local, tambe na diferente galeria y centronan di arte internacional. E artista Nelson Gonzalez kier gradici Prins Bernhard Cultuurfonds Caribbean por su apoyo pa por a realisa e proyecto aki. Publico local ta keda cordialmente invita. Entrada completamente gratis, dia 15 di april 2022, pa 7:30 pm.
