Radiothon 'Musica pa Educacion' tin como meta pa yuda 500 mucha cu material escolar

ORANJESTAD (AAN): Alejandra Forero a presenta e iniciativa pa recauda fondonan,

'Musica pa Educacion' organisa pa radio Caliente 90.7, cu lo ta na beneficio di Fundacion pa Nos Comunidad. E Radiothon lo tuma lugar diasabra, 3 di Augustus di 6'or pa 6'or.

El a splica cu nan iniciativa tin como meta recauda materialnan escolar pa muchanan den necesidad. Nan ta haci un invitacion na comunidad pa participa y cualkier donacion ta haci un diferencia.

E situacion economico na Aruba ta duro pa hopi mayor, y no por cumpra material escolar pa nan yiunan. Pa motibo aki, Caliente 90.7 ta uni forsa cu Fundacion pa Nos Comunidad pa busca mas sponsors, y esnan cu por contribui na un bon causa.

El a agrega cu director di Caliente 90.7, Juan Carlos Ventura ta traha duro riba e iniciativa aki y nan tin mas di 8 aña yudando muchanan cu ta inscribi den Fundacion pa Nos Comunidad   pa haya nan material pa cuminsa nan aña escolar.

Forero ta invita tanto comerciantenan y comunidad pa haci un contribucion durante e Radiothon 'Musica pa Educacion' .

Juan Carlos Ventura, director di Caliente 90.7, ta contento di por haci algo pa aporta na comunidad, sea pa medio di promocion di un evento y e ta kere ta hopi importante como medio pa yuda esnan den mas necesidad. Den ultimo añanan, problemanan social a aumenta y no por laga tur cos pa gobierno y critica sin haci nada. Cada ciudadano por haci un diferencia.

Ventura a elogia trabao di Fundacion pa Nos Comunidad, cu ta haci tur nan esfuerso pa yuda esnan den mas necesidad. E tambe ta gradici su ekipo y cu aña pasa nan por a yuda mas di 500 famia pa haya material escolar pa e muchanan. 

Gabriel Marchena,  di Fundacion pa nos Comunidad, a indica cu e fundacion ta hopi contento di por forma parti di otro evento pa 'back to school' hunto cu Caliente 90.7, cu pa 14 aña largo ta yudando muchanan den necesidad y cu ta depende di e ayudo aki.

Fundacion pa Nos Comunidad ta registra e muchanan cu mester di material pa scol, na unda nan ta wak e situacion financiero di e mayornan y asina evalua y midi e necesidad. Ta hopi importante pa mayornan sa cu ora nan ta registra nan yiunan, mester presenta cu identificacion valido y di nan yiunan, pa asina nan por comproba cu e muchanan ta forma parti di e hogar.

Marchena a bisa cu e fundacion ta hopi gradici cu e sosten cu nan ta haya tur aña di comerciantenan y comunidad cu ta yuda nan den nan proyectonan. Na final di dia, educacion di muchanan ta primordial. Ta importante pa e muchanan sinti cu sin importante nan situacion financiero, tin un comunidad cu semper ta cla pa yuda nan.

Actualmente tin 350 mucha registra, pero e meta ta pa yuda por lo menos 500 mucha. Pa mas informacion tuma contacto cu e fundacion of cu Caliente 90.7.