E di 4 edicion di 'Ride4Kids' ta bay tuma lugar 18 di Augustus

ORANJESTAD (AAN): E aña aki ta bay tuma lugar e di 4 edicion di ‘Ride4Kids’, cu ta un evento cu Kiwanis Club of Palm Beach a cuminza cune den tempo di COVID.

Durante un conferencia di prensa, chairman di Ride4Kids Rothmar Coenraad a splica cu den e prome edicion di e evento tabata tin 3 ciclista cu a core rond Aruba pa recauda fondo pa e causanan di Kiwanis Club.

“Despues cu den e prome Ride4Kids tabata tin participacion di 3 ciclista, awe nos por bisa cu e aña aki ta bay tin mas cu 100 ciclista cu ta bay ta riba caminda pa recauda fondo”.
E meta di e aña aki ta bay ta manera semper pa nos recauda fondo pa yuda muchanan y famianan di menos recurso, pa paga e schoolgeld pa e muchanan, segun Coenraad.

El a sigui bisa cu 2 aña pasa a logra yuda un record di mas cu 100 mucha, mientras cu aña pasa a yuda mas cu 150 mucha.

E intencion ta pa e aña aki yuda mas cu 200 mucha di menos recurso.

“Nos tin un lista largo y  nos meta ta pa yuda mas di e muchanan aki posibel”.

Naturalmente Kiwanis Club of Palm Beach no por haci esaki su so y pesey ya caba mi ta pidi danki na tur e ciclistanan cu ta bay core e ruta participa, como tambe nos sponsor principal Guardians Group, como tambe Johnson Notary y tur otro cu ta yuda cu e evento importante aki, segun Coenraad.

El a splica cu e Ride4Kids ta bay ta 18 di Augustus y ta cuminza 1’or di marduga, cu ta ora cu e prome ciclistanan ta sali riba e trayecto di 200 kilometer.

Ainda ciclistanan por registra pa participa, via e pagina di Facebook di Kiwanis Club of Palm Beach.