*Tambe ta invita miembronan pa un reunion general importante
ORANJESTAD (AAN): Cooperativa di Ahoro y Prestamo Aruba (CAPA) ta informa su miembronan y comunidad di Aruba cu desde mita di aña 2026, un Raad van Toezicht (RvT) nobo ta activo den e cooperativa.
E miembronan di e Raad van Toezicht nobo a wordo eligi durante Reunion General di Miembronan (ALV) den 2025. Despues di haya e aprobacion necesario di Centrale Bank van Aruba (CBA) den 2026, nan por a cuminsa oficialmente cu nan tareanan.
Desde nan entrada, e Raad van Toezicht nobo a cuminsa traha activamente riba profesionalisacion, continuidad y futuro di CAPA. Un di nan prioridadnan principal ta e seleccion y nombramento di dos director nobo.
Despues di un proceso di seleccion cuidadoso y extenso durante e ultimo lunanan, Raad van Toezicht a selecciona dos candidato pa e funcion di director. E dos candidatonan aki lo wordo presenta na e miembronan durante e proximo Reunion General pa nan aprobacion.
Raad van Toezicht nobo cu hopi experiencia
E Raad van Toezicht nobo ta consisti di cuater miembro cu experiencia den mundo bancario, servicio financiero, belasting, management y den e cooperativa mes.
Richard Lopes-Slot MCC – Presidente
Richard Lopes-Slot tin mas di 20 aña di experiencia den sector bancario. El a ocupa diferente funcion di management na Rabobank, un banco cooperativo na Hulanda. Despues, el a traha como interim manager pa diferente banco den varios parti di Hulanda. Cu su experiencia den liderazgo, management y servicio financiero, e kier contribui na un CAPA mas profesional y prepara pa futuro.
Gento Gil – Vicepresidente
Gento Gil tin amplio experiencia den CAPA y na Belastingdienst. Su conocemento di e cooperativa y su experiencia profesional ta un contribucion valioso pa supervision y desaroyo di CAPA.
Mary Geerman – Comunicacion y Formacion
Mary Geerman tin amplio experiencia como estadistico na Aruba y frecuentemente ta ocupa su mes cu investigacion y analisis profundo di cifranan. Den Raad van Toezicht, e ta encarga su mes entre otro cu comunicacion y formacion.
Eveline Tromp – Secretario
Eveline Tromp tambe tin hopi aña di experiencia den CAPA y a ocupa diferente funcion den e organisacion. Ademas, el a traha durante hopi aña den Gobierno di Aruba. Como secretario, e ta apoya Raad van Toezicht pa ehecuta su tareanan di un manera cuidadoso y profesional.
Supervision, compromiso y confiansa
Raad van Toezicht tin como tarea pa supervisa y controla e Directie di CAPA. E Raad van Toezicht ta responsabel na Reunion General di Miembronan, cu ta e organo mas halto di CAPA.
E funcion di director no por wordo combina cu e funcion di miembro di Raad van Toezicht. E Raad van Toezicht nobo ta comprometi pa traha cu pasion, dedicacion y profesionalismo na bienestar di e miembronan, estabilidad financiero y un futuro fuerte pa CAPA.
Raad van Toezicht ta invita tur miembro di CAPA cordialmente pa participa na e Reunion General cu lo tuma luga diahuebs 26 november 2026 pa 6’or di atardi na Auditorium di EPI.
Durante e reunion importante aki, e miembronan lo haya oportunidad pa conoce personalmente e Raad van Toezicht nobo y e dos candidato pa director di CAPA.
Ambos candidato lo presenta nan mes y conta tocante nan experiencia, motivacion y vision pa futuro di CAPA. Despues, conforme e statuutnan di CAPA, nan lo wordo presenta oficialmente na Reunion General pa aprobacion.
Despues di aprobacion di Reunion General, ainda ta necesario pa haya permiso di Centrale Bank van Aruba prome cu e directornan nobo por cuminsa oficialmente den nan funcion.
Raad van Toezicht ta haci un yamada na tur miembro pa ta presente y participa activamente den futuro di nan cooperativa.