Eddy Oduber a lanza su buki ‘Keda Leu Di Cangreu’

Eddy Oduber a lanza su buki ‘Keda Leu Di Cangreu’

Naci for di su columna semanal cu el a cuminsa skirbi pa DIARIO na 2006

ORANJESTAD (AAN): Diahuebs anochi, acompaña pa famia y amigo, e autor Eddy Oduber a presenta oficialmente su buki ‘Keda Leu Di Cangreu’ na Biblioteca Nacional na Oranjestad.  E buki, skirbi completamente na Papiamento, ta contene 55 articulo cu ta invita e lesado pa pensa, reflexiona y compronde su mes y comportamiento humano miho.

   Con e buki a nace: E historia di Keda Leu di Cangreu ta cuminsa na 2006, ora cu Eddy a cuminsa traha como hypnotherapista. E tempo ey, el a nota cu tabatin un falta grandi di informacion accesibel na Papiamento tocante mente humano, hypnosis y con e mente ta funciona. Cu e deseo pa comparti su conocimiento cu publico di Aruba, el a acerca señora Nuhad Mansur di DIARIO cu e proposicion pa publica un articulo tur siman.

   Asina a nace HypnotiSA, un columna cu durante varios aña tabata aparece tur Diamars den DIARIO.  el a skirbi mas of menos 130 articulo di cual mas cu 80 a keda publica. E articulonan tabata varia den estilo y contenido. Algun tabata basa ariba experiencia personal, otro tabata historia, metafora of situacion di bida DIARIO. Tin tambe articulonan cu a nace simplemente for di su imaginacion.

   Un encuentro cu a cambia tur cos: Un di e momentonan mas significativo den e storia di e buki a sosode un dia na un funeraria. Un cabayero, cu Eddy ta yama Roy den su prologo pa proteha su identidad, a acerc'e y a pidi cinco minuut pa papia cu ne. Roy a conta cu su señora recientemente a fayece den un tragedia. Cu lagrima na wowo, el a splica cu tur Diamars e y su señora tabata cumpra DIARIO y lesa e articulonan di HypnotiSA hunto. E siman di e tragedia, un di e articulonan a toca nan profundamente. Roy a gradici Eddy, tanto na su propio nomber como na nomber di su señora, pa e articulonan cu durante añanan nan a disfruta hunto.

   Prome cu Roy a despedi, el a comparti un deseo: Cu un dia Eddy lo a publica su articulonan den forma di un buki, pa tur hende cu ta papia Papiamento por haya oportunidad di lesa nan. E encuentro ey a laga un impresion profundo riba Eddy. E palabranan di Roy a keda cu ne durante añanan y a bira un di e motibonan principal pa finalmente publica su articulonan den forma di un buki.

   Cu publicacion di Keda Leu di Cangreu, e deseo di Roy y e soño di Eddy a bira realidad.

   Di con e titulo Keda Leu di Cangreu: Eddy a scoge Keda Leu di Cangreu como titulo pasobra, pe, e ta e articulo mas importante di e coleccion. Ademas, ta e articulo cu a provoca mas reaccion entre su lectornan. E interes tabata asina grandi cu Eddy a traduci e articulo na Ingles y Spaño pa por comparti'e cu mas hende. E titulo ta representa tambe e caracter di e buki: un invitacion pa reflexiona, cuestiona nos manera di pensa y observa nos bida for di un perspectiva diferente.

   Como reconocemento pa su contribucion na e cuminsamento di e columna original, Eddy a entrega e prome ehemplar na director actual di DIARIO, Jossito Mansur.  E di dos ehemplar el a entrega na Biblioteca Nacional, como muestra di aprecio pa su importante trabao den conservacion di nos idioma, literatura y herencia cultural.

    Eddy a conclui e anochi cu un mensahe simpel cu ta resumi e proposito di su buki: "Mi no kier bisa hende kico nan mester pensa. Mi kier invita nan pa pensa." E buki lo ta obtenibel pa 37,50 Florin na Nature’s Discount.