Na opinion di Organizacion OPPA:
ORANJESTAD (AAN): “Aruba ta pasando pa un momento cu mester haci nos para un momento y reflexiona seriamente riba e direccion cu nos pais ta tuma. Nos ta mira un isla caminda turismo ta sigui florece, hotelnan ta sigui construi, inversionnan ta aumenta y e actividad economico ta sigui crece. Pero, tras di e imagen bunita aki, tin un realidad cu ta preocupa y cu no por sigui wordo ignora: calidad di bida di nos propio ciudadanonan no ta avanza na e mesun ritmo cu e crecemento economico di nos isla,” segun OPPA (Organisacion di Pensionado Publico di Aruba).
E pregunta cu nan ta haci ta: di ki ta sirbi un economia cu ta crece, si e ciudadano comun no ta sinti e beneficio den su bida diario?
Costo di bida a bira un preocupacion, cada dia mas grandi. Cuminda, producto basico, huur, awa, coriente y e otro necesidadnan esencial ta costa cada bes mas. Pa hopi famia, e entrada mensual no ta alcansa mas pa cubri tur gasto.
Trahadornan, e pensionadonan y e personanan cu un entrada limita ta sinti e presion aki tur dia. Pa e gruponan mas vulnerabel di nos sociedad, e situacion ta bira ainda mas dificil.
Mientras tanto, nos careteranan ta den un condicion cu ta exigi atencion urgente. Trafico, deteriora door di e infrastructura y e incomodidad cu esaki ta causa pa nos ciudadanonan ta bira parti di nos bida diario. Un pais cu ta aspira na un posicion internacional como destino turistico mester garantisa tambe Infrastructura digno y sigur pa su propio habitantenan.
Pero e preocupacion no ta keda solamente na infraestructura.
Nos sistema di salubridad ta sigui confronta reto serio. Lista di espera pa consulta cu specialistanan ta bira cada bes mas largo. Pa un persona cu tin mester di atencion medico, cada siman of cada luna di espera por representa dolor, angustia y incertidumbre. Salubridad no por wordo trata como un luho of un servicio secundario. E ta un derecho fundamental di cada ciudadano.
Tambe tin preocupacion rond di e servicio di BOI, caminda hopi sorpresa y incertidumbre ta afecta nos grandinan y e otro personanan cu ta depende di e sistemanan di apoyo social. Nos grandinan, despues di a dedica un gran parti di nan bida na construccion di Aruba, merece mas claridad, respet, stabilidad y un trato digno.
Y ora nos wak e servicio di Keuringslokaal, tampoco nos por keda satisfecho. E servicio ta laga hopi di desea y e lista di espera ta agrega un carga mas riba e ciudadanonan cu simplemente kier cumpli cu nan obligacionnan y recibi e servicio cu nan tin derecho riba dje.
Esaki ta e contraste cu nos mester enfrenta: turismo ta florece, pero servicio publico esencial ta keda atras.
OPPA no ta bisa cu turismo no ta importante. Al contrario, turismo ta un pilar fundamental di nos economia. Pero e desaroyo di un pais no por wordo midi solamente pa cantidad di turista, hotel nobo, entrada di divisa of inversion grandi. Un pais mester wordo midi tambe pa e bienestar di su pueblo, pa e calidad di su servicio publico y pa e seguridad economico y social di su ciudadanonan.
No por ta asina cu e turista cu ta pasa un siman na Aruba ta haya un experiencia di luho, mientras cu e ciudadano cu ta biba aki tur dia mester lucha pa haya un cita cu un specialista, un servicio publico na tempo of pa cubri su gastonan basico.
Nos mester puntra nos mes: unda nos prioridadnan ta situa?
Kico ta sosode cu e planificacion di nos pais? Ken ta vigila cu e crecemento economico ta wordo traduci den un miho calidad di bida pa e pueblo?
Nos ta haya falta di un vision nacional cu ta bay mas leu cu turismo. Nos tin necesidad di inversion den salubridad, Infrastructura, proteccion social, vivienda, transporte publico y servicio publico eficiente. Nos mester maneho publico cu tin prioridadnan cla, metanan medibel y responsabilidad pa e resultadonan.
Y especialmente, nos mester pone atencion urgente na nos adultonan mayor. Un sociedad no por considera su mes progresivo si su grandinan, despues di a contribui durante decenia na construccion di e pais aki, ta enfrenta incertidumbre financiero, dificultad pa haya atencion medico y obstaculo pa recibi servicio publico.
Aruba no por sigui crece solamente pa e turista. Aruba mester crece tambe pa su propio pueblo.
Nos no por acepta cu e progreso di nos isla ta wordo conta solamente den cantidad di turista, camber di hotel y entrada economico. E progreso berdadero mester wordo sinti den cas di cada famia, den bida di cada trahador, den seguridad di cada pensionado y den e bienestar di nos grandinan.
E momento a yega pa Gobierno, Parlamento y tur instancia responsabel reflexiona actua. No solamente cu promesa, discurso of anuncio, sino cu decision concreto, plan di accion y resultado cu e pueblo por mira y sinti.
Pasobra, un pais no ta bira prospero solamente ora e tin mas turista. Un pais ta bira prospero ora su propio pueblo por biba cu dignidad, seguridad y bienestar. Y Aruba, definitivamente, merece mucho mas cu solamente un bon imagen pa exterior. No por tin un Aruba prospero pa turista, si nos propio Pueblo ta keda atras!