Raad van Advies a presenta su Relato Anual 2025 na Minister-Presidente

ORANJESTAD (AAN): Presidente di Raad van Advies, mr. David Kock, y e secretario, mr. Albert Braamskamp,

a bishita Minister-Presidente mr. Mike Eman dia 18 di februari 2026, pa formalmente entrega e Relato Anual 2025.

   E encuentro a transcuri den un ambiente ameno y constructivo, unda a reflexiona riba e trabaonan realisa durante e aña pasa y riba diferente desaroyo riba tereno di legislacion y acesoria constitucional.

Durante e conversacion, a keda resalta cu Raad van Advies ta celebrando su 40 aña di existencia e aña aki. E aniversario aki ta representa un logro historico y un momento significativo den e consolidacion institucional di Aruba. Desde cu Aruba a bira un pais aparte, e Raad a cumpli un rol fundamental den e proceso legislativo.

   For di e Relato Anual 2025 ta sali e Raad ta preocupa cu e reduccion di produccion legislativo compara cu añanan anterior. Minister-Presidente a splica cu, apesar di e reduccion den cantidad, tin diferente iniciativa di ley actualmente den preparacion. Dos propuesta di ley ta cla pa evaluacion na Raad van Advies, mientras cu un cantidad di otro trayecto legislativo a out-source pa reenforsa y acelera e capacidad di produccion legislativo.

   Raad van Advies a enfatisa cu lo nan sigui monitorea e desaroyonan y a subraya e importancia di legislacion di calidad, cu ta juridicamente solido y practicable.

   Como tarea principal, Raad van Advies ta duna acesoria independiente riba diseñonan di landsverordeningen, landsbesluiten y otro regulacionnan. Cu su rol acesora, e Raad ta contribui na garantisa calidad huridico, coherencia y ehecutabilidad di e legislacion di Aruba.