Quota Club of Aruba a clausura su Siman di Cuido di Oido hopi druk y cu hopi test cu a wordo realiza

ORANJESTAD (AAN) Stella Monsanto, Service Director di Quota Club of Aruba 2024-2025, den entrevista cu DIARIO a elabora tocante e Siman di Cuido di Oido.

   El a menciona cu Quota a cuminza na inicio di September cu un campaña di concientizacion di cuido di oido cual a wordo clausura Diabierna ultimo.

   Nan a ricibi hopi peticion cu e dia mes di e clausura a caba laat pasobra ainda tabata bezig cu hopi test.

   Señora Monsanto a gradici tur e partnernan di Quota Club pa e siman di concientizacion, un di nan ta SVb San Nicolas, The Specialists, FEPO y Aruba Hearing Institute, pasobra sin nan, Quota lo no a logra e campaña aki.

Monsanto a yama bon bini na invitadonan special, Prome Minister y miembronan di Quota, y seguidamente SVb San Nicolas a duna resumen corto di loke a pasa den e siman, den e acto di clausura di e siman di concientizacion pa cuido di oido.

Señora Geerman hunto cu su colega Sabrina Ridderstap un bez mas a conduci e testnan di oido, na SVb San Nicolas. El a indica cu e aña aki nan a haci un total di 41 test, di cual 28 tabata pa damas, y 13 pa cabayero. E promedio di edad pa cada un tabata entre 40 y 85 aña. Y den ambos grupo mayoria test tabata di personanan entre edad di 70 cu 80 aña.  Den e grupo di damanan a señala siete persona cu deficiencia y den e grupo di cabayero a señala cuater persona cu deficiencia, y nan a referi e casonan aki door.

Geerman a comenta cu e aña aki nan a nota cu tabata tin menos test di oido compara cu aña pasa, pero a ricibi varios persona cu no a yega di test prome.

Algun tabata sospecha di tin problema di oido, y kier a verifica esaki, y otronan tabata sorprendi, contento, cu nan no tabata tin perdida di oido y un par tabata tin algun señal.

Pero nan a mira cu mayoria di persona cu a bin test, riba 50 aña, incluyendo su persona, cu tin 40, y cu  a haci e test di nobo despues di como 9 aña pa miedo di e resultado, y e tin un deficiencia significante na e edad relativamente jong.

Señora Geerman ta puntra si e miedo aki ta touch personanan bao di 50? Por ta e ta duna resistencia y ta bin test menos? “Aunke no tin cura bo por preveni pa bira peor, of bo por busca ayudo adecua pa mehora bo calidad di bida riba e aspecto aki, pasobra tur dia nos ta uza nos oido, y nos no por ta mal gradici y neglisha bo oido”, señora Geerman a expresa. El agrega cu ora bo ta haci test y ta haya e resultado manera esun di dje, bo ta bira mas conciente y bo lo kier cuida bo oido mas. “Nos di SVb ta hopi agradecido do por a apoya y colabora cu e campaña aki, y nos ta spera cu otro aña nos por ta parti di esaki atrobe”, e dama a expresa.