Quota Club Aruba ta preparando pa 'Denim & Bling Fundraising Event'

Ivy Simon a splica cu nan meta ta pa recauda 80 mil florin pa duna bek na comunidad:

ORANJESTAD (AAN) – Manera ta conoci Quota Club ta preparado pa su fiesta anual cu e aña aki ta yama: 'Denim & Bling Fundraising Event' cu lo tuma lugar dia 26 di November 2023, na Renaissance Convention Center, cual fondo recauda ta pa duna bek na comunidad. E evento ta cuminza pa 12’or di merdia te cu 5’or di atardi.

            Señora Ivy Simons, miembro di Quota Club Aruba, den conferencia di prensa reciente, a duna di conoce cu na 2022 a logra recauda 60 mil florin, loke no tabata facil como nan prome stap despues di e pandemia, cu nan a logra duna bek na comunidad.

            Simon a subraya cu e aña aki nan kier bay un tiki mas, nan kier wak si por yega na 80 mil florin, vooral pasobra pa otro aña nan tin algun meta tambe. Ivy a menciona cu costo di bida ta subi locual Quota ta compronde, pero di otro banda, Quota tey pa yuda scol, instancianan manera, entre otro, Wit Gele Kruis, y tur caminda unda hende no ta para keto un rato, Quota tey pa yuda nan.

            El a menciona cu ta na luna di Maart cu QUOTA ta duna bek na comunidad, locual nan ta recauda, y e aña aki nan a haya dos peticion caba y mientras tanto e organizacion no ta warda te na Maart, sino cu ta wak e necesidad di e peticion y ta yuda e instancianan concerni tambe.

            Durante e aña nan tin e Centro Orthopedagogico, na Dakota, e muchanan di Scol Scucha Nos, ainda; y ta yuda nan durante e aña y e instancianan cu ta haci peticion, QUOTA ta evalua, y ta duna bek na comunidad. Quota tin su pagina facebook y un jingle cu ta andando aworaki. E simannan nos dilanti Quota ta bay ta mas pendiente y activo pa warda e yamadanan pa pasa busca ticket pa e evento di 2023.