FAVI a clausura su siman di concientizacion cu un caminata

ORANJESTAD (AAN) — FAVI a cera su siman di concientizacion, Dia di Garoti blanco-strepi Cora, y den entrevista cu DIARIO, Sary Wernet-Kelly, Terapista di Revalidacion, a comenta cu hopi automobilista lo a wak e clientenan di FAVI ta cruza caya, na diferente distrito.

            Ultimo lugar cu nan a bishita ta San Nicolas, hunto cu FAVI su clientenan di San Nicolas, cu ta activo pa haci e demostracion di uzo di garoti y concientiza e comunidad.

            Wernet a bisa cu speed (velocidad) ta algo cu lamentablemente no por controla. E ta keda hunga un rol y crea peligro pa e peaton cu ta uza zebrapad of trafico en general. No obstante, automobilistanan ta mas conciente di FAVI su accionnan y demostracion, y mayoria ta para y ta duna e señal. “Nos ta contento cu esey si, pero tambe tin algun cu toch no tin e pasenshi di warda, ta pita ora e persona ta cruza poco, poco. Trafico cu ta bin di e otro banda, of ta purba pasa, esey tambe tin. Nos a experiencia esey ora nos tabata na Pos Chikito, cu ta un cruzada hopi peligroso, cu un banda ta para pero e otro banda no ta haci’e. Mester pone un tiki mas di conciencia cu eynan tin un zebrapad, y cu subimento y bahamento di un rotonde, no mester ta riba un speed halto”, señora Wernet a señala.

            Un persona cu incapacidad visual no sa unda e zebrapad pa e cruza caminda ta. Señora Werleman a comenta cu e ta un momento dificil, pa cada un cliente; e miedo, e inseguridad, ta hunga un rol grandi.          “Awo, nos tin hopi cliente cu ta pa prome biaha ta bay haci uso di garoti y cruza un caminda, pa nan ta un reto. Nan kier haci’e bon, y e peligro ta keda e trafico. “P’esey nos kier cooperacion di e automobilista y di comunidad en general, pa duna nan e confianza ey”, señora Wernet a subraya.

FAVI a cera su Siman di Concientizacion riba Dia di Garoti cu un caminata, Diadomingo cu a pasa. E tabata un tremendo caminata. E tabata FAVI su di diez edicion, y pa un bon causa.