Gwendeline van Trikt- Rojer di Quota
ORANJESTAD (AAN): Quota International of Aruba ta sigui cu nan campañanan di conscientisacion di cuido di oido durante temporada di Carnaval. Pa mas di 20 aña, Quota boluntariamente ta bishitando scolnan basico rond Aruba durante periodo di Carnaval pa conscientisa nos muchanan, specialmente di klas 6, riba e importancia pa cuida nan oido. Señor Glenn Rock di WEB Aruba NV tambe a participa na e sesionnan aki na unda a splica e peliger di perde oido.
Gwendeline van Trikt- Rojer di Quota ta expresa cu cada aña e mensahe ta haya mas atencion di e muchanan. Nan ta keda hopi impresiona y ta hiba e mensahe cas cerca nan mayornan y demas famia. E aña aki a bishita scolnan na San Nicolas, Paradera, Tanki Leendert. Apesar cu no por bishita tur scol, e demanda ta grandi y Quota ta disponibel pa cualkier scol cu pidi nan bishita pa duna charla.
Señora Trikt-Rojer a remarca cu WEB Aruba NV, pa 16 aña a uni cu Quota pa nan campaña di earplug y charla na scolnan pa muchanan di klas 6. Un earplug por haci hopi efecto y ta evita daño riba oido ora ta expone pa hopi largo den desordo of musica fuerte. Y hopi biaha, hende ta goza sin realisa esaki. Quota tur aña ta enfoca riba algun bario na Aruba.
Tambe, Van Trikt-Rojer a duna di conoce, cu gruponan di Carnaval semper por contacta Quota via nan pagina di Facebook pa entre otro earplugs. Tambe Quota su presencia den paradanan di Carnaval nunca ta faya y tur participante y esnan banda di caminda por acerca miembronan di Quota pa nan earplugs especialmente pa nos muchanan.
