ROTTERDAM: Un caso hopi straño a tuma luga na Hulanda, unda e hoben identifica como Tariq Martina a wordu señala door di un Taxista cu tabata pasando eybanda.
El a mira claramente con e persona hoben ta cana tur straño canto di caminda, na un forma suf of ta comosifuera el a dwaal y no sa unda e ta. Diripiente el a mira con e persona hoben aki ta sak den otro y cay abao.
E Taxista ta stop su vehiculo, y a core baha pa mira kico a pasa cu e hoben. El a pasa man pa su smartphone y a bati alarma mesora, yamando 112 cu ta e number pa Polis y Ambulans pa nan yega na e lugar y asina presta asistencia.
Autoridadnan a identifica e hoben como Tariq Martina procedente di Curaçao, kende ta esun cu a sucumbi canto di caminda, y paramediconan a stabilisa su curpa, y cu urgencia a bay cune departamento di emergencia di hospital.
Lamentablemente un par di ora despues ta drenta e noticia cu e hoben Tariq Martina a fayece na Hospital. Docternan no sa ta kico a pasa cune, y asina Ministerio Publico a duna ordo pa practica autopsia pa por saca afo ta di kico e hoben a fayece.
Informacion nobo ta indica cu danki na e autopsia a determina cu e hoben tabata tin hemoragia interno, pues tabata sangrando paden. Esey ta e motibo pakico el a cuminsa actua lento, debi cu su presion di sanger tabata cayendo.
Awor a indica pa sigui haci analisis pa haya sa con bin e hoben tabata sangra di paden. Polisnan a keda check wak tur camara den becindaro pa por saca afo si ta bati nan a bati e hoben of ta un vehiculo lo a dal e pero no tin por a deduci nada di esaki.
