Segun Presidente di CUA Frans Ponson:
- Bo tin cu paga p’e y esun mas barata ta 200 mil florin
ORANJESTAD (AAN) Presidente di Comerciantenan Uni Aruba (CUA), Frans Ponson, a sigui elabora tocante e problema di otorgamento di tereno erfpacht, pa hende local, y trahamento di cas.
Segun Ponson, antes e ciudadanonan tabata haya tereno erfpacht como regalo di gobierno, pero aworaki tur e terenonan no tey mas.
El a señala cu nos tur sa cu e ultimo añanan aki, gobierno no a duna ni un tereno, e problema di FCCA aworaki ta cu e ciudadano ta cumpra e tereno, y e tereno mas barata na Aruba ta costa 200 mil florin.
“Y ora e ta yega na e tereno, ainda e mester traha e cas, y esaki sigur ta nada straño pa cualkier hende cu ta lesa e noticia aki. Antes, claro bo ta kita e 200 florin di e tereno e cas ta sali mas barata, pero awo no tin tereno mas”, el a enfatiza.
El a haci e pregunta “Y ken ta cumprando e tereno ora nos pone na benta? Si bo ta bay bende bo cas mañan, mi ta sigur nos no ta bay discuti si sea un hende stranhero ta ofrece bo e doble di e prijs, bo ta bay bend’e toch? Ban ta honesto, Frans Ponson tambe ta haci’e, nos tur ta haci’e. So, mi no ta bisa cu e ta algo malo, e ta algo cu nos tin cu atende cu ne. Mi no sa kico e ta, pero mi ta kere e ta un discusion cu nos tin cu atende cu ne, pasobra si bo tin cu paga pa e tereno minimo 200 mil florin, y riba dje traha bo cas, no tin manera pa FCCA tampoco haci’e batata. E ta un problema cu nos tin cu atende den su totalidad”, Frans Ponson a reitera.
Ponson a subraya cu CUA sa cu gobierno anterior no a duna ni un tereno, y mester bay wak si e gobierno actual ta bay atende cu e asunto aki, y cambia e leynan.
