Seraida Pemberton-Leonard:
ORANJESTAD (AAN)—Directora di Reclassering, señora Seraida Pemberton-Leonard, den entrevista cu DIARIO a señala tambe cu traha cu e otro instancianan, ta hopi importante pa Reclassering
Reclassering no por takel tur situacion, mirando tambe cu no tin suficiente personal pa abarca tur cos y diferente aspecto pa e hobennan cu ta haya nan mes cu problemanan hudicial. Reclassering ta pidi nan pa duna charla na e hobennan, of referi nan na e instancia adecua.
Edadnan di e mayornan di hobennan cu ta cay cera, ta varia. No tin un perfil specifico di e mayornan, señora Pemberton a indica. Pues tin un diversidad di mayornan den edad y caracteristica, y tin mayornan local y di otro nacionalidad tambe.
“Locual ta hopi duidelijk ta cu mayoria di e hobennan cu ta cay cera ta naci na Aruba. Un di nos enfokenan ta bishita scolnan, y ya caba nos ta acercando scol dunando charla. Nos tin un programa cu un stagiaire a traha pa nos, pa nos por cuminza bay den scolnan. E falta di personal den Reclassering ta limita nos den hopi cos, di loke nos por haci”, Señora Pemberton a reitera.
“Tin diferente factor cu mester drecha of mester cambia, si nos kier cambio den nos hobennan. Entre otro, e sistema di scolnan, e sistema na cas, e sistema cu hopi hoben no tin cosnan positivo pa haci den nan tempo liber. Tin hopi cos cu mester takel, y mi no ta kere ta Reclassering so mester haci, pero mester ta un joint venture, entre diferente organizacion, y hasta gobierno unda tur mester haci nan parti pa por drecha e situacion”, segun director di Reclassering, señora Seraida Pemberton.
