Señor Ricardo Arends, Coordinador, ta splica:
ORANJESTAD (AAN) – Ricardo Arends, Coordinador di e “Proyecto Wikipedia in Residence” a splica cu e proyecto “Wikipedia riba Aruba”, ta un iniciativa di Wikipedia Nederland, unda a cuminza un proyecto di 18 luna, for di Januari 2025.
Ta trata aki di un proyecto piloto cu pa prome biaha den Caribe cu sa di esaki, y Aruba por ta un ehemplo den e area Caribense cerca.
Locual e proyecto ta encera ta pa por haci e presencia di Aruba mas fuerte riba Wikipedia, pa fortalece y amplia e conocemento di Aruba riba Wikipedia. “Y asina tambe por garantiza, cu informacion confiable y accesible ta disponible pa e hendenan di Aruba mes, pero tambe pa e publico global. Nos meta en si, ta pa tin un comunidad cu ta dedica su mes na comparti informacion, pone esaki riba Wikipedia y haci’e accesible. Pero Wikipedia mes, ta hopi amplio. Tin diferente plataforma di Wikimedia, cual por ta skirbimento, yena data, trece informacion, tambe por ta subi potretnan di Aruba, y tur esaki ta parti di e proyecto “Wikipedia riba Aruba”, señor Ricardo Arends, a señala.
El a agrega cu e informacion di Aruba riba Wikipedia por ta tocante tur tema, loke bo ta wak, pero nan kier enfoca hopi riba loke ta e herencia di Aruba, cultura y historia di Aruba, y mas importante cu tur cos, esaki ta bay ta na Idioma Papiamento.
“E razon ta cu nos kier promove nos lenguahe local, y nos tin caba un pagina cu yama ‘pap cu Wikipedia’ cu a wordo lanza na 2006, den cual tin riba 5 mil articulo caba na Papiamento, pero e idea ta pa tin hopi mas articulo, pa comparti den nos mesun idioma, y automaticamente, esaki ta wordo traduci pa rond mundo, hende por haya acceso na esaki tambe”, Arends a indica.
Arends a agrega cu nan tin cinco partner den e proyecto aki, entre otro, Fondo di Monumento, Archivo Nacional, Biblioteca Nacional, y UNOCA. “Nos a traha hunto y e idea ta pa tur e coleccionnan aki, di un manera of otro, cu ayudo di boluntarionan den e comunidad di Aruba, of nos mes como guianan di e proyecto aki, por subi informacion riba e Plataforma di Wikipedia”, señor Ricardo Arends a señala.
