ORANJESTAD (AAN): Gobierno di Aruba, Ministerio di Cultura y e Comision Celebracion Dianan Nacional (CCDN) ta invita henter pueblo di Aruba pa un ceremonia solemne na Monumento 18 di Maart, unda lo rindi honor na e 2147 firmantenan cu a sostene e lucha pa nos Status Aparte.
Fundacion 18 di maart di su banda tambe ta recorda, cu e fecha 18 di Maart como nos Dia Nacional no a wordo escogi sin mas. E tin un historia profundo su tras, un historia di deseo sincero di un pueblo humilde pero determina, combina cu un lucha ferviente cu a dura decadanan largo y cu finalmente a culmina dia 1 di Januari 1986 cu realisacion di nos Status Aparte.
Den palabranan historico di Betico Croes den eilandsraad:
“18 di Maart a wordo escogi pa motibo di e fecha 18 di maart 1948, un dia riba Aruba unda tur conciudadano por uni cu un sentimiento comun, caminda a expresa cu porfin nos por canta nos Himno Nacional oficial y porfin hisa nos bandera oficial di Aruba.”
A toca honor na e nieto di nos prome luchador pa separacion, e pionero den politica Arubiano, difunto Henny Eman sr., esta Henny Eman jr. pa habri aña nobo como e prome Minister Presidente di pais Aruba. Un deseo a wordo cumpli.
Exactamente dies aña despues, riba 18 di Maart 1986, Aruba a celebra e realisacion di e soño di tres generacion di Arubiano, cu Henny Eman como e prome Minister Presidente di pais Aruba.
Riba e fecha historico aki nos ta honra:
E politiconan cu a hiba e lucha pa Status Aparte
E 2147 firmantenan cu a sostene e mocion presenta na Conferencia di Mesa Rondo riba 18 di Maart 1948 door di Shon A. Eman
Y e 95 firmantenan di e peticion di 30 di Juli 1947
Lamentablemente Betico Croes ta fayece dia 26 di november 1986 sin nunca recobra conocimento, despues di un accidente grave riba bispo di aña 1985.
Historia no ta algo cu nos por cambia; e ta un fundeshi esencial di nos identidad como pueblo. E lucha pa Status Aparte a cuminsa ya na inicio di siglo pasa cu Henny Eman sr. na timon, y e firmantenan ta prueba di e compromiso y determinacion di pueblo Arubiano.
Gobierno di Aruba, Ministerio di Cultura y CCDN ta invita pueblo di Aruba pa ta presente na e ceremonia solemne aki dia 16 di Maart proximo, for di 5:00 te 7:00 di atardi na Plaza 18 di Maart.
Laga nos reuni, recorda y honra esnan cu a traha pa e libertad y autonomia cu nos disfruta awe.
